Hum se Qutaybah bin Saeed ne bayan kiya , kaha hum se Jareer bin Abd-ul-Hameed ne bayan kiya , in se Aamash ne , in se Abu Salih ne aur in se Abu Hurairah razi Allahu anhu ne bayan kiya ke Rasool Allah salla Allahu alaihi wasallam ne farmaya ”Allah ke kuch farishte aise hain jo raston mein phirte rehte hain aur Allah ki yaad karne walon ko talash karte rehte hain . Phir jahan woh kuch aise logon ko pa laite hain ke jo Allah ka zikr karte hote hain to ek doosre ko aawaz dete hain ke aao hamara matlab haasil ho gaya . Phir woh pehle aasman tak apne paron se un par umandte rehte hain . Phir khatm par apne Rabb ki taraf chale jaate hain . Phir in ka Rabb in se poochhta hai .... haalan-ke woh apne bandon ke mutalliq khoob jaanta hai .... ke mere bande kya kehte thay ? Woh jawab dete hain ke woh teri tasbeeh parhte thay , teri kibriyai bayan karte thay , teri hamd karte thay aur teri barayi karte thay . Phir Allah Ta'ala poochhta hai kya unhon ne mujhe dekha hai ? Kaha ke woh jawab dete hain nahi , wallah! Unhon ne tujhe nahi dekha . Is par Allah Ta'ala farmata hai , phir in ka is waqt kya haal hota jab woh mujhe dekhe huay hote ? Woh jawab dete hain ke agar woh tera deedar kar laite to teri ibadat aur bhi bahut zyada karte , teri barayi sab se zyada bayan karte , teri tasbeeh sab se zyada karte . Phir Allah Ta'ala daryaft karta hai , phir woh mujh se kya maangte hain ? Farishte kehte hain ke woh jannat maangte hain . Bayan kiya ke Allah Ta'ala daryaft karta hai kya unhon ne jannat dekhi hai ? Farishte jawab dete hain nahi , wallah Ae Rabb! Unhon ne teri jannat nahi dekhi . Bayan kiya ke Allah Ta'ala daryaft karta hai in ka is waqt kya aalam hota agar unhon ne jannat ko dekha hota ? Farishte jawab dete hain ke agar unhon ne jannat ko dekha hota to woh is se aur bhi zyada khwahish-mand hote , sab se barh kar is ke talab-gaar hote . Phir Allah Ta'ala poochhta hai ke woh kis cheez se panah maangte hain ? Farishte jawab dete hain , dozakh se . Allah Ta'ala poochhta hai kya unhon ne jahannum dekha hai ? Woh jawab dete hain nahi , wallah , unhon ne jahannum ko dekha nahi hai . Allah Ta'ala farmata hai , phir agar unhon ne usay dekha hota to in ka kya haal hota ? Woh jawab dete hain ke agar unhon ne usay dekha hota to is se bachne mein woh sab se aage hote aur sab se zyada is se khauf khaate . Is par Allah Ta'ala farmata hai ke main tumhein gawah banata hoon ke main ne in ki maghfirat ki . Nabi Karim salla Allahu alaihi wasallam ne farmaya ke is par in mein se ek farishte ne kaha ke in mein falan bhi tha jo in zhakireen mein se nahi tha , balkay woh kisi zaroorat se aa gaya tha . Allah Ta'ala irshad farmata hai ke yeh (zhakireen) woh log hain jin ki majlis mein baithne wala bhi na-murad nahi rehta . Is hadees ko Shubah ne bhi Aamash se riwayat kiya lekin is ko marfoo nahi kiya . Aur Suhayl ne bhi is ko apne walidain Abu Salih se riwayat kiya , unhon ne Abu Hurairah razi Allahu anhu se , unhon ne Nabi Karim salla Allahu alaihi wasallam se .