Hum se Hudba bin Khalid ne bayan kiya, kaha hum se Humam bin Yahya ne bayan kiya, kaha hum se Qatadah bin Du'ama ne bayan kiya, in se Anas razi Allahu anhu ne aur in se Maaz razi Allahu anhu ne phir wahi hadees mazkoora bala bayan ki.

Hum se Umar bin Hafs bin Ghiyas ne bayan kiya, kaha mujh se mere walid ne bayan kiya kaha hum se Aamash ne bayan kiya, kaha hum se Zayd bin Wahb ne bayan kiya (kaha ke) wallah hamase Abu Zarr razi Allahu anhu ne maqam e Rabzhah mein bayan kiya ke main Rasool Allah salla Allahu alaihi wasallam ke saath raat ke waqt Madinah Munawwarah ki kaali pattharon wali zameen par chal raha tha ke Uhud pahar dikhayi diya. Nabi Karim salla Allahu alaihi wasallam ne farmaya ke Ae Abu Zarr! Mujhe pasand nahi ke agar Uhud pahar ke barabar bhi mere paas sona ho aur mujh par ek raat bhi is tarah guzar jaye ya teen raat ke is mein se ek dinar bhi mere paas baqi bache. Siwaye is ke jo main qarz ki adayigi ke liye mahfooz rakh loon main is saare sone ko Allah ki makhlooq mein is is tarah taqseem kar doon ga. Abu Zarr razi Allahu anhu ne is ki kaifiyat hamain apne hath se lap bhar kar dikhayi. Phir Nabi Karim salla Allahu alaihi wasallam ne farmaya ke Ae Abu Zarr! Main ne arz kiya «labbaika wa sadaika» ya Rasool Allah! Nabi Karim salla Allahu alaihi wasallam ne farmaya ke zyada jama karne wale hi (sawab ki haisiyat se) kam haasil karne wale hon ge. Siwaye is ke jo Allah ke bandon par maal is is tarah yani kasrat ke saath kharch kare. Phir farmaya yahien thehre raho Abu Zarr! Yahan se is waqt tak na hatna jab tak main wapas na aa jaoon. Phir Aap salla Allahu alaihi wasallam tashreef le gaye aur nazron se ojhal ho gaye. Is ke baad main ne aawaz suni aur mujhe khatra hua ke kahin Nabi Karim salla Allahu alaihi wasallam ko koi pareshani na pesh aa gayi ho. Is liye main ne (Nabi Karim salla Allahu alaihi wasallam ko dekhne ke liye) jaana chaha lekin fauran hi Nabi Karim salla Allahu alaihi wasallam ka yeh irshad yaad aaya ke yahan se na hatna. Chunanche main wahien ruk gaya (jab Aap tashreef laaye to) main ne arz ki. Main ne aawaz suni thi aur mujhe khatra ho gaya tha ke kahin Aap ko koi pareshani na pesh aa jaye phir mujhe Aap ka irshad yaad aaya is liye main yahien thehar gaya. Aap salla Allahu alaihi wasallam ne farmaya yeh Jibrail alaihissalam thay. Mere paas aaye thay aur mujhe khabar di hai ke meri ummat ka jo shakhs bhi is haal mein mare ga ke Allah ke saath kisi cheez ko shareek na thehrata ho to woh jannat mein jaye ga. Main ne arz kiya: ya Rasool Allah! Agarche us ne zina aur chori ki ho? Nabi Karim salla Allahu alaihi wasallam ne farmaya ke haan agar us ne zina aur chori bhi ki ho. (Aamash ne bayan kiya ke) main ne Zayd bin Wahb se kaha ke mujhe maloom hua hai ke is hadees ke raawi Abu al-Darda razi Allahu anhu hain? Zayd ne farmaya main gawahi deta hoon ke yeh hadees mujh se Abu Zarr razi Allahu anhu ne maqam e Rabzhah mein bayan ki thi. Aamash ne bayan kiya ke mujh se Abu Salih ne hadees bayan ki aur in se Abu al-Darda razi Allahu anhu ne isi tarah bayan kiya aur Abu Shihab ne Aamash se bayan kiya.