Hum se Sulayman bin Harb ne bayan kiya , kaha hum se Hammad bin Zayd ne , in se Yahya bin Saeed ne , in se Ubaid bin Hunain ne aur in se Ibn Abbas razi Allahu anhuma ne bayan kiya ke main Umar razi Allahu anhu se un auraton ke baare mein jinon ne Nabi Karim salla Allahu alaihi wasallam ke muamla mein ittafaq kar liya tha , poochne ka irada karta raha lekin un ka raub samne aa jata tha . Ek din (Makkah ke rasta mein) ek manzil par qiyam kiya aur peelu ke darakhton mein (woh qaza e hajat ke liye) tashreef le gaye . Jab qaza e hajat se farigh ho kar wapas tashreef laaye to main ne poochha unhon ne batlaya ke Aisha aur Hafsa razi Allahu anhuma hain phir kaha ke jahiliyat mein hum auraton ko koi haisiyat nahi dete thay . Jab Islam aaya aur Allah Ta'ala ne in ka zikr kiya (aur in ke huqooq) mardon par bataye tab hum ne jaana ke in ke bhi hum par kuch huqooq hain lekin ab bhi hum apne muamlat mein in ka dakheel banna pasand nahi karte thay . Mere aur meri biwi mein kuch guftagu ho gayi aur us ne teiz o tund jawab mujhe diya to main ne is se kaha achha ab naubat yahan tak pahunch gayi . Is ne kaha tum mujhe yeh kehte ho aur tumhari beti Nabi Karim salla Allahu alaihi wasallam ko bhi takleef pahunchati hai . Main (apni beti Umm al-Momineen) Hafsa ke paas aaya aur is se kaha main tujhe tanbeeh karta hoon ke Allah aur is ke Rasool ki nafarmani kare . Nabi Karim salla Allahu alaihi wasallam ko takleef pahunchane ke muamla mein sab se pehle main hi Hafsa ke yahan gaya phir main Umm Salamah ke paas aaya aur in se bhi yahi baat kahi lekin unhon ne kaha ke hairat hai tum par Umar! Tum hamare muamlat mein dakheel ho gaye ho . Sirf Rasool Allah salla Allahu alaihi wasallam aur Aap ki azwaj ke muamlat mein dakhal dena baqi tha . (so ab woh bhi shuru kar diya) unhon ne meri baat radd kar di . Qabila Ansar ke ek sahabi thay jab woh Nabi Karim salla Allahu alaihi wasallam ki suhbat mein maujood na hote aur main hazir hota to tamam khabrein in se aa kar bayan karta tha aur jab main Nabi Karim salla Allahu alaihi wasallam ki suhbat se ghair hazir hota aur woh maujood hote to woh Nabi Karim salla Allahu alaihi wasallam ke mutalliq tamam khabrein mujhe aa kar sunate thay . Aap ke charon taraf jitne (badshah waghaira) thay in sab se Aap ke talluqat theek thay . Sirf Sham ke mulk Ghassan ka hamain khauf rehta tha ke woh kahin ham par hamla na kar de . Main ne jo hosh o hawas durust kiye to wahi Ansari sahabi thay aur keh rahe thay ke ek hadsa ho gaya . Main ne kaha kya baat hui . Kya Ghassan charh aaya hai . Unhon ne kaha ke is se bhi bara hadsa ke Rasool Allah salla Allahu alaihi wasallam ne apni azwaj ko talaq de di . Main jab (Madinah) hazir hua to tamam azwaj ke hujron se rone ki aawaz aa rahi thi . Nabi Karim salla Allahu alaihi wasallam apne bala-khana par chale gaye thay aur bala-khana ke darwaze par ek nau-jawan pehre-dar maujood tha main ne is ke paas pahunch kar is se kaha ke mere liye Nabi Karim salla Allahu alaihi wasallam se andar hazir hone ki ijazat maang lo phir main andar gaya to Aap ek chitayi par tashreef rakhte thay jis ke nishanat Aap ke pehlu par pare huay thay aur Aap ke sar ke neeche ek chhota sa chamre ka takiya tha . Jis mein khajoor ki chhaal bhari hui thi . Chand kachi khaalein latak rahi thien aur babool ke patte thay . Main ne Nabi Karim salla Allahu alaihi wasallam se apni in baaton ka zikr kiya jo main ne Hafsa aur Umm Salamah se kahi thien aur woh bhi jo Umm Salamah ne meri baat radd karte huay kaha tha . Nabi Karim salla Allahu alaihi wasallam is par muskura diye . Aap ne is bala-khana mein untees din tak qiyam kiya phir Aap wahan se neeche utar aaye .