Aur Khabbab bin al-Arat razi Allahu anhu ne kaha ke hum ne Nabi Karim salla Allahu alaihi wasallam se (mushrikeen e Makkah ke mazalim ki) shikayat ki is waqt Aap apni ek chadar par taik lagaye huay thay.

Hum se Ismail bin Abdullah ne bayan kiya, kaha ke mujh se Imam Malik ne bayan kiya, in se Ishaq bin Abdullah bin Abi Talha ne aur in se Anas bin Malik razi Allahu anhu ne bayan kiya ke main Rasool Allah salla Allahu alaihi wasallam ke saath chal raha tha. Nabi Karim salla Allahu alaihi wasallam ke jism e mubarak par (Yaman ke) Najran ki bani hui motay hashiye ki ek chadar thi. Itne mein ek dehati aa gaya aur us ne Nabi Karim salla Allahu alaihi wasallam ki chadar ko pakar kar itni zor se khaincha ke main ne Nabi Karim salla Allahu alaihi wasallam ke moondhay par dekha ke is ke zor se khainchne ki wajah se nishan par gaya tha. Phir us ne kaha: Ae Muhammad! Mujhe is maal mein se diye jaane ka hukm kijiye jo Allah ka maal Aap ke paas hai. Nabi Karim salla Allahu alaihi wasallam is ki taraf mutawajjo huay aur muskuraye aur Aap ne usay diye jaane ka hukm farmaya.