Hum se Khalid bin Makhlad ne bayan kiya, kaha hum se Sulayman bin Bilal ne bayan kiya, in se Yahya bin Saeed Ansari ne bayan kiya ke main ne Abu Salamah bin Abd-ur-Rahman bin Auf se suna, kaha ke main ne Abu Qatadah razi Allahu anhu se suna, unhon ne kaha ke main ne Rasool Allah salla Allahu alaihi wasallam se suna, Nabi Karim salla Allahu alaihi wasallam ne farmaya ke beshak achha khwab Allah ki taraf se hota hai, aur hulm (bura khwab jis mein ghabrahat ho) shaytan ki taraf se hota hai is liye jab tum mein se koi shakhs koi aisa khwab dekhe jo bura ho to jaagte hi teen martaba bayein taraf thoo thoo kare aur is khwab ki burayi se Allah ki panah maange, is tarah khwab ka usay nuqsan nahi ho ga aur Abu Salamah ne kaha ke pehle baaz khwab mujh par pahar se bhi zyada bhaari hota tha jab se main ne yeh hadees suni aur is par amal karne laga, ab mujhe koi parwah nahi hoti.