Yani ”tumhari mutallaqa biwiyon mein se jo haiz aane se mayoos ho chuki hon , agar tumhein shubha ho“ ki tafseer Mujahid ne kaha yani jin auraton ka haal tum ko maloom na ho ke un ko haiz aata hai ya nahi aata . Isi tarah woh auratein jo burhapay ki wajah se haiz se mayoos ho gayi hain . Isi tarah woh auratein jo na-balighi ki wajah se abhi haiz wali hi nahi hui hain . In sab qism ki auraton ki iddat teen mahine hai .

Hum se Yahya bin Bukayr ne byaan kiya , kaha hum se Layth bin Saad ne byaan kiya , in se Jafar bin Rabee ne , in se Abdur Rahman bin Hurmuz ne , kaha ke mujhe khabar di Abu Salamah bin Abdur Rahman ne ke Zaynub Umm Salamah razi Allahu anha ne apni walda Nabi Karim salla Allahu alaihi wasallam ki zauja mutahhara Umm Salamah razi Allahu anha se khabar di ke ek khatoon jo Islam layi thien aur jin ka naam Subay-ah tha , apne shohar ke saath rehti thien , shohar ka jab intiqal hua to woh hamila thien . Abu Sanabil bin Ba'kak razi Allahu anhu ne in ke paas nikah ka paigham bheja lekin unhon ne nikah karne se inkar kiya . Abu al-Sanabil ne kaha ke Allah ki qasam! Jab tak iddat ki do muddaton mein se lambi na guzar loon gi , tumhare liye is se (jis se nikah woh karna chahti thien) nikah karna sahih nahi ho ga . Phir woh (waza hamal ke baad) taqreeban das din tak ruki rahein . Is ke baad Nabi Karim salla Allahu alaihi wasallam ki khidmat mein hazir huien to Nabi Karim salla Allahu alaihi wasallam ne farmaya ke ab nikah kar lo .