Aur Abdul Waris bin Saeed ne byaan kiya , in se Khalid Hazza ne , in se Ikrimah ne aur in se Ibn Abbas razi Allahu anhuma ne ke agar koi Nasrani aurat apne shohar se thori der pehle Islam layi to woh apne khawand par haram ho jati hai aur Dawood ne byaan kiya ke in se Ibrahim al-Saa'igh ne ke Ata se aaisi aurat ke mutalliq poocha gaya jo Zimmi qaum se talluq rakhti ho aur Islam qabool kar le , phir is ke baad is ka shohar bhi is ki iddat ke zamana hi mein Islam le aaye to kya woh isi ki biwi samjhi jaye gi ? Farmaya ke nahi albatta agar woh naya nikah karna chahe , naye mahr ke saath (to kar sakta hai) Mujahid ne farmaya ke (biwi ke Islam laane ke baad) agar shohar is ki iddat ke zamana mein hi Islam le aaya to is se nikah kar lena chahiye aur Allah Ta'ala ne farmaya «la hunna hillul lahum wa la hum yahilloona lahunna» ke ”na momin auratein mushrik mardon ke liye halal hain aur na mushrik mard momin auraton ke liye halal hain .“ Aur Hasan aur Qatadah ne do Majoosiyon ke baare mein (jo miyan biwi thay) jo Islam le aaye thay , kaha ke woh donon apne nikah par baqi hain aur agar in mein se koi apne saathi se (Islam mein) sabqat kar jaye aur doosra inkar kar de to aurat apne shohar se juda ho jati hai aur shohar usay haasil nahi kar sakta (siwa nikah e jadeed ke) aur Ibn Jurayj ne kaha ke main ne Ata se poocha ke mushrikeen ki koi aurat (Islam qabool karne ke baad) agar Musalmanon ke paas aaye to kya is ke mushrik shohar ko is ka mahr wapas kar diya jaye ga ? Kyunke Allah Ta'ala ne farmaya hai «wa aatoohum ma anfaqoo» ”aur unhein woh wapas kar do jo unhon ne kharch kiya ho .“ Ata ne farmaya ke nahi , yeh sirf Nabi Karim salla Allahu alaihi wasallam aur muahid mushrikeen ke darmiyan tha aur Mujahid ne farmaya ke yeh sab kuch Nabi Karim salla Allahu alaihi wasallam aur Quraish ke darmiyan baahmi sulah ki wajah se tha .

Hum se Yahya bin Bukayr ne byaan kiya , kaha hum se Layth bin Saad ne byaan kiya , in se Aqeel ne , in se Ibn Shihab ne aur Ibrahim bin al-Munzhir ne byaan kiya ke mujh se Abdullah bin Wahb ne byaan kiya , in se Yunus ne byaan kiya ke Ibn Shihab ne byaan kiya ke mujhe Urwah bin Zubayr ne khabar di aur in se Nabi Karim salla Allahu alaihi wasallam ki zauja mutahhara Aisha razi Allahu anha ne byaan kiya ke momin auratein jab Hijrat kar ke Nabi Karim salla Allahu alaihi wasallam ke paas aati thien to Nabi Karim salla Allahu alaihi wasallam unhein aazmate thay ba-wajah Allah Ta'ala ke is irshad ke «ya ayyuhallazhina aamanu izha ja'akum-ul-mu'minaatu muhaajiraatin famtahinoohunna» ke ”Ae woh logo! Jo iman le aaye ho , jab momin auratein tumhare paas Hijrat kar ke aayein to unhein aazmao“ . Aakhir aayat tak . Aisha razi Allahu anha ne byaan kiya ke phir in (Hijrat karne wali) momin auraton mein se jo is shart ka iqrar kar leti (jis ka zikr isi Surah al-Mumtahina mein hai ke ”Allah ka kisi ko shareek na thehrao gi“) to woh aazmaish mein poori samjhi jati thi . Chunanche jab woh is ka apni zaban se iqrar kar letien to Rasool Allah salla Allahu alaihi wasallam in se farmate ke ab jao main ne tum se ahad le liya hai . Hargiz nahi! Wallah! Nabi Karim salla Allahu alaihi wasallam ke hath ne (bai'at lete waqt) kisi aurat ka hath kabhi nahi chhooa . Nabi Karim salla Allahu alaihi wasallam in se sirf zaban se (bai'at lete thay) . Wallah! Nabi Karim salla Allahu alaihi wasallam ne auraton se sirf unhi cheezon ka ahad liya jin ka Allah ne Aap ko hukm diya tha . Bai'at lene ke baad Aap in se farmate ke main ne tum se ahad le liya hai . Yeh Aap sirf zaban se kehte ke main ne tum se bai'at le li .