Aur Muawiyah bin Haydah se marfoo-an marwi hai (usay Abu Dawood waghaira ne nikala hai) ke aurat ka chhorna ghar hi mein ho magar pehli hadees (yani Anas razi Allahu anhu ki) zyada sahih hai .

Hum se Abu Aasim ne byaan kiya , in se Ibn Jurayj ne (doosri sanad) Imam Bukhari rahmahullah ne kaha aur mujh se Muhammad bin Muqatil ne byaan kiya , kaha hum ko Abdullah bin Mubarak ne khabar di , unhein Ibn Jurayj ne khabar di , kaha ke mujhe Yahya bin Abdullah bin Sayfi ne khabar di , unhein Ikrimah bin Abdur Rahman bin Haris ne khabar di aur unhein Umm Salamah razi Allahu anha ne khabar di ke Nabi Karim salla Allahu alaihi wasallam ne (ek waqia ki wajah se) qasam khayi ke apni baaz azwaj ke yahan ek mahina tak nahi jayein ge . Phir jab untees din guzar gaye to Nabi Karim salla Allahu alaihi wasallam in ke paas subah ke waqt gaye ya shaam ke waqt Nabi Karim salla Allahu alaihi wasallam se arz kiya gaya ke Aap ne to qasam khayi ku ke ek mahina tak nahi aayein ge ? Aap ne farmaya ke mahina untees din ka bhi hota hai .