Aur haram hain tum par tumhari biwiyon ki larkiyaan (woh jo doosre khawand layein) jin ko tum parwarish karte ho jab in biwiyon se dukhool kar chuke ho aur Ibn Abbas razi Allahu anhuma ne ke lafz «dukhoolun» aur «maseesun» aur «maasa» in sab se jima hi murad hai aur is qaul ka byaan ke joru ki aulad (maslan poti ya nawasi) bhi haram hai kyunke Nabi Karim salla Allahu alaihi wasallam ne Umm Habibah razi Allahu anha se farmaya apni betiyon aur behnon ko mujh par na pesh kiya karo to betiyon mein bete ki beti (poti) aur beti ki beti (nawasi) sab aa gayin aur is tarah bahuon mein poat-bahu (pote ki biwi) aur betiyon mein bete ki betiyaan (potiyaan) aur nawasiyaan sab dakhil hain aur joru ki beti har haal mein rabibah hai khwah khawand ki parwarish mein ho ya aur kisi ke paas parwarish paati ho , har tarah se haram aur Nabi Karim salla Allahu alaihi wasallam ne apni rabibah (Zaynub ko) jo Abu Salamah ki beti thi ek aur shakhs (Naufal Ashjai) ko paalne ke liye di aur Nabi Karim salla Allahu alaihi wasallam ne apne nawase Hasan razi Allahu anhu ko apna beta farmaya .

Hum se Humaydi ne byaan kiya , kaha hum se Sufyan bin Uyaynah ne byaan kiya ke hum se Hisham bin Urwah ne byaan kiya , un se un ke walid ne aur un se Zaynub bint Abi Salamah ne aur un se Umm Habibah razi Allahu anha ne byaan kiya ke main ne arz kiya: ya Rasool Allah! Aap Abu Sufyan ki sahibzadi (Ghurrah ya Durrah ya Hamna) ko chahte hain . Nabi Karim salla Allahu alaihi wasallam ne farmaya ke phir main is ke saath kiya karoon ga ? Main ne arz kiya ke is se Aap nikah kar lein . Farmaya kiya tum usay pasand karo gi ? Main ne arz kiya main koi tanha to hoon nahi aur main apni behen ke liye yeh pasand karti hoon ke woh bhi meere saath Aap ke talluq mein shareek ho jaye . Is par Nabi Karim salla Allahu alaihi wasallam ne farmaya ke woh meere liye halal nahi hai main ne arz kiya mujhe maloom hua hai ke Aap ne (Zaynub se) nikah ka paigham bheja hai . Nabi Karim salla Allahu alaihi wasallam ne farmaya ke Umm Salamah ki larki ke paas ? Main ne kaha ke ji haan . Nabi Karim salla Allahu alaihi wasallam ne farmaya ke wah wah , agar woh meri rabibah na hoti jab bhi woh meere liye halal na hoti . Mujhe aur is ke walid Abu Salamah ko Suwayba ne doodh pilaya tha . Dekho tum aainda meere nikah ke liye apni larkiyon aur behnon ko na pesh kiya karo . Aur Layth bin Saad ne bhi is hadees ko Hisham se riwayat kiya hai is mein Abu Salamah ki beti ka naam Durrah mazkoor hai .