Aur Allah Ta'ala ne (Surah Nisa mein) in ko byaan farmaya hai «hurrimat alaykum ummahatukum wa banaatukum wa akhawatukum wa ammatukum wa khaalaatukum wa banaat-ul-akhi wa banaat-ul-ukhti» ke ”haram hain tum par maayein tumhari , betiyaan tumhari , behnein tumhari , phoophiyaan tumhari , khaalaayein tumhari , bhateejiyaan tumhari , bhaanjiyaan tumhari . Beshak Allah janne wala hikmat wala hai .“ Anas bin Malik razi Allahu anhu ne kaha «wal muhsanaatu minan-nisa'i» se khawand wali auratein murad hain jo aazad hon woh bhi haram hain aur «wa ma malakat aimanukum» ka yeh matlab hai ke agar kisi ki laundi is ke ghulam ke nikah mein ho to us ko ghulam se chheen kar yani talaq dilwa kar khud apni biwi bana sakte hain aur Allah ne yeh bhi farmaya «wa la tankihoo-l-mushrikaati hatta yu'minna» ke mushrik auraton se jab tak woh iman na layein nikah na karo . Aur Ibn Abbas razi Allahu anhuma ne kaha char auratein hote huay paanchween se bhi nikah karna haram hai , jaise apni maan , beti , behen se nikah karna .

Aur Imam Ahmad bin Hanbal ne mujh se kaha ke hum se Yahya bin Saeed Qattan ne byaan kiya , unhon ne Sufyan Sawri se , kaha mujh se Habib bin Abi Sabit ne byaan kiya , unhon ne Saeed bin Jubayr se , unhon ne Ibn Abbas razi Allahu anhuma se , unhon ne kaha khoon ki roo se tum par saat rishte haram hain aur shadi ki wajah se (yani sasural ki taraf se) saat rishte bhi . Unhon ne yeh aayat parhi «hurrimat alaykum ummahatukum» aakhir tak . Aur Abdullah bin Jafar bin Abi Talib ne Ali razi Allahu anhu ki sahibzadi Zaynub aur Ali ki bi bi (Laila bint Masood) donon se nikah kiya , un ko jama kiya aur Ibn Sireen ne kaha is mein koi qabahat nahi hai aur Imam Hasan Basri ne ek baar to usay makrooh kaha phir kehne lage is mein koi qabahat nahi hai aur Hasan bin Hasan bin Ali bin Abi Talib ne apne donon chachaon (yani Muhammad bin Ali aur Amr bin Ali) ki betiyon ko ek saath mein nikah mein le liya aur Jabir bin Zayd tabiy ne is ko makrooh jaana , is khayal se ke behnon mein jalapa na paida ho magar yeh kuch haram nahi hai kyunke Allah Ta'ala ne farmaya «wa uhilla lakum ma wara'a zhaalikum» ke in ke siwa aur sab auratein tum ko halal hain . Aur Ikrimah ne Ibn Abbas razi Allahu anhuma se riwayat kiya ke agar kisi ne apni saali se zina kiya to is ki biwi (saali ki behen) is par haram na ho gi . Aur Yahya bin Qays Kindi se riwayat hai , unhon ne Shabi aur Jafar se , donon ne kaha agar koi shakhs liwaatat kare aur kisi launde ke dukhool kar de to ab is ki maan se nikah na kare . Aur Yahya rawi mashhoor shakhs nahi hai aur na kisi aur ne is ke saath ho kar yeh riwayat ki hai aur Ikrimah ne Ibn Abbas razi Allahu anhuma se riwayat ki ke agar kisi ne apni saas se zina kiya to is ki biwi is par haram na ho gi . Aur Abu Nasr ne Ibn Abbas razi Allahu anhuma se riwayat ki ke haram ho jaye gi aur is rawi Abu Nasr ka haal maloom nahi . Is ne Ibn Abbas razi Allahu anhuma se suna hai ya nahi (lekin Abu Zurah ne isay siqa kaha hai) aur Imran bin Husain aur Jabir bin Zayd aur Hasan Basri aur baaz Iraq walon (Imam Sawri aur Imam Abu Hanifa rahmahullah) ka yahi qaul hai ke haram ho jaye gi . Aur Abu Hurairah razi Allahu anhu ne kaha haram na ho gi jab tak is ki maan (apni khush-daman) ko zameen se na laga de (yani is se jima na kare) aur Saeed bin Musayyab aur Urwah aur Zuhri ne is ke mutalliq kaha hai ke agar koi saas se zina kare tab bhi is ki beti yani zina karne wale ki biwi is par haram na ho gi (us ko rakh sakta hai) aur Zuhri ne kaha Ali razi Allahu anhu ne farmaya ke is ki joru is par haram na ho gi aur yeh riwayat munqata hai .