Hum se Ibrahim bin Hamza ne bayan kiya, kaha hum se Ibrahim bin Sa’d ne bayan kiya, unhon ne Saleh bin Kaisaan se, unhon ne Ibn-e-Shihaab se, unhon ne Ubaidullah bin Abdullah se, un ko Abdullah bin Abbas Radhiallahu Anhuma ne khabar di, un ko Abu Sufyan bin Harb ne ke Hiraql (Room ke baadshaah) ne un se kaha. Main ne tum se poocha tha ke us Rasool ke maanne waale badh rahe hain ya ghat rahe hain. Tu ne jawaab mein batlaaya ke woh badh rahe hain. (Theek hai) imaan ka yahi haal rehta hai yahan tak ke woh poora ho jaaye aur main ne tujh se poocha tha ke koi us ke deen mein aa kar phir us ko bura jaan kar phir jaata hai? Tu ne kaha. Nahi, aur imaan ka yahi haal hai. Jab us ki khushi dil mein sama jaati hai to phir us ko koi bura nahi samajh sakta.