«matla-un» ba-fataha (masdar hai) tuloo ke ma'non mein aur «matli-un» ba-kasr laam (jaise Kasai ne parha hai) woh maqam jahan se sooraj nikle. «inna anzalnaahu» mein zameer Quran ki taraf phirti hai (go ke Quran ka zikr oopar nahi aaya hai magar is ki shaan barhane ke liye idh-maar qablaz-zhikr kiya) «anzalnaahu» sigha e jama mutakallim ka hai haalan ke utaarne wala ek hi hai yani Allah Paak magar Arbi mein wahid ko «jamee-un» aur isbat ke liye ba-sigha e jama laate hain.

«munfak-keena» ke maani chhorne wale. «qayyimah-tun» qaim aur mazboot haalan ke deen muzakkar hai magar is ko muannas yani «qayyimah-tun» ki taraf mudhaaf kiya, deen ko millat ke maani mein liya jo muannas hai.

Hum se Muhammad bin Bashar ne byaan kiya, kaha ke hum se Ghundar ne byaan kiya, kaha hum se Shubah ne byaan kiya, main ne Qatadah se suna aur unhon ne Anas bin Malik razi Allahu anhu se ke Rasool Allah salla Allahu alaihi wasallam ne Ubayy bin Kabb se farmaya ke Allah Ta'ala ne mujhe hukm diya hai ke tumhein Surah «lam yakun-illazhina kafaroo» parh kar sunaoon. Ubayy bin Kabb razi Allahu anhu ne arz kiya, kya Allah Ta'ala ne mera naam bhi liya hai? Aap salla Allahu alaihi wasallam ne farmaya ke haan, is par woh rone lage.