Mujahid ne kaha «wizraka» se woh baatein murad hain jo Nabi Karim salla Allahu alaihi wasallam se jahiliyat ke zamana mein saadir huien (tark e ula waghaira) . «anqada» ke maani bhaari kiya . «ma-al usri yusran» Sufyan bin Uyaynah ne kaha is ka matlab yeh hai ke ek museebat ke saath do niamatein milti hain jaise aayat «hal tarabbasoona bina illa ihdal husnayayni» mein Musalmanon ke liye do naikiyaan murad hain aur hadees mein hai ek museebat do naikiyon par ghalib nahi aa sakti aur Mujahid ne kaha «fansab» yani apne Parvardigar se dua maangne mein mehnat utha . Aur Ibn Abbas razi Allahu anhuma se manqool hai unhon ne kaha «alam nashrah laka sadraka» se murad hai ke hum ne tera seena Islam ke liye khol diya .

Mujahid ne kaha ke aayat mein wahi teen (anjeer) aur zaitoon mashhoor meway zikr huay hain jinhein log khate hain . «fa-ma yukazzhibuka» yani kya wajah hai jo tu is baat ko jhutlaye ke Qayamat ke din logon ko un ke aamal ka badla mile ga . Goya yun kaha kaun keh sakta hai ke tu azab aur sawab ko jhutlane lage .

Hum se Hajjaj bin Minhal ne byaan kiya , unhon ne kaha hum se Shubah ne byaan kiya , unhon ne kaha mujhe Adi bin Sabit ne khabar di , unhon ne kaha ke main ne Bara bin Azib razi Allahu anhu se suna ke Nabi Karim salla Allahu alaihi wasallam ek safar mein thay aur Isha ki ek rakat mein Aap ne Surah wat-Teen ki tilawat farmayi thi . «taqweemin» ke maani paidaish , banawat ke hain .