Yani «ma wad-da'aka rabbuka wa ma qala» tashdeed aur takhfeef donon tarah parha ja sakta hai aur maani ek hi rahein ge , yani Allah ne tujh ko chhora nahi hai . Ibn Abbas razi Allahu anhuma ne kaha ke mafhoom yeh hai «ma tarakaka wa ma abghadaka» yani Allah ne tujh ko chhora nahi hai aur na woh tera dushman bana hai .

Hum se Muhammad bin Bashar ne byaan kiya , kaha hum se Muhammad bin Jafar Ghundar ne , kaha hum se Shubah ne , un se Aswad bin Qays ne byaan kiya ke main ne Jundub Bajali razi Allahu anhu se suna ke ek aurat Umm al-Momineen Khadija razi Allahu anha ne kaha ke ya Rasool Allah! Main dekhti hoon ke Aap ke dost (Jibraeel alaihissalam) Aap ke paas aane mein der karte hain . Is par aayat nazil hui «ma wad-da'aka rabbuka wa ma qala» yani ”Aap ke Parvardigar ne na Aap ko chhora hai aur na Aap se woh bezar hua hai .“