‏‏‏‏ Mujahid ne kaha ke «tabattal» ke maani khalis isi ka ho ja aur Imam Hasan Basri ne farmaya «ankaalan» ka maani beriyaan hain. «munfatirun bihi» is ke sabab se bhaari ho jaye ga, bhaari ho kar phat jaye ga. Ibn Abbas ne kaha «kaseebam maheelan» phisalti behti rait. «wa-beelan» ke maani sakht ke hain.

‏‏‏‏ Ibn Abbas razi Allahu anhuma ne kaha «aseerun» ka maani sakht. «qaswaratun» ka maani logon ka shor o ghul. Abu Hurairah razi Allahu anhu ne kaha «qaswaratun» sher ko kehte hain aur har sakht aur zor dar cheez ko «qaswaratun» kehte hain. «mustanfiratun» bharakne wali.

Hum se Yahya ne byaan kiya, kaha hum se Waki ne byaan kiya, un se Ali bin Mubarak ne byaan kiya, un se Yahya bin Abi Kaseer ne, unhon ne Abu Salamah bin Abdur Rahman se poocha ke Quran Majeed ki kaun si aayat sab se pehle nazil hui thi. Unhon ne kaha ke «ya ayyuhal muddasshiru» main ne arz kiya ke log to kehte hain ke «iqra bismi rabbikallazhi khalaqa» sab se pehle nazil hui. Abu Salamah ne is par kaha ke main ne Jabir bin Abdullah razi Allahu anhuma se poocha tha aur jo baat abhi tum ne mujh se kahi wahi main ne bhi un se kahi thi lekin Jabir razi Allahu anhu ne kaha tha ke main tum se wahi hadees byaan karta hoon jo hamain se Rasool Allah salla Allahu alaihi wasallam ne irshad farmayi thi. Aap salla Allahu alaihi wasallam ne farmaya tha ke main Ghaar e Hira mein ek muddat ke liye khilwat-nasheen tha. Jab main woh din poore kar ke pahar se utra to mujhe aawaz di gayi, main ne is aawaz par apne dayein taraf dekha lekin koi cheez nahi dikhayi di. Phir bayein taraf dekha idhar bhi koi cheez dikhayi nahi di, samne dekha idhar bhi koi cheez nahi dikhayi di. Peeche ki taraf dekha aur idhar bhi koi cheez nahi dikhayi di. Ab main ne apna sar oopar ki taraf uthaya to mujhe ek cheez dikhayi di. Phir main Khadija razi Allahu anha ke paas aaya aur un se kaha ke mujhe kapra orha do aur mujh par thanda pani daalo. Farmaya ke phir unhon ne mujhe kapra orha diya aur thanda pani mujh par bahaya. Farmaya ke phir yeh aayat nazil hui «ya ayyuhal muddasshiru * qum fa-anzhir * wa rabbaka fakabbir» yani ”Ae kapre mein liptne wale! Uth-iye phir logon ko azab e Ilahi se drayiye aur apne Parvardigar ki barayi byaan kijiye.“