Mujahid ne kaha «bi-husbaanin» yani chakki ki tarah ghoom rahe hain. Auron ne kaha «wa aqeemul wazna» ka maani yeh hai ke tarazu ki zaban seedhi rakho (yani barabar tolo). «asfun» kehte hain kheti ki is paidawar (sabze) ko jis ko pakne se pehle kaat lein yeh to «asfun» ke maani huay aur yahan «rayhaanun» se kheti ke patte aur dane jin ko khate hain murad hain. Aur «rayhaanun» Arabon ki zaban mein rozi ko kehte hain baazon ne kaha khush-boodar sabze ko baazon ne kaha «asfun» woh dana jin ko khate hain aur «rayhaanun» woh pakka ghalla jis ko kacha nahi khate. Auron ne kaha «asfun» gehoon ke patte hain. Dahhak ne kaha «asfun» bhoosa jo janwar khate hain. Abu Malik Ghifari ne kaha «asfun» kheti ka woh sabza jo pehle pehl ugta hai kisan log is ko «haboor» kehte hain. Mujahid ne kaha «asfun» gehoon ka patta aur «rayhaanun» rozi ka. «al-maariju» aag ki lapat (ko) zard ya sabz jo aag roshan karne par oopar charhti hai baazon ne Mujahid se riwayat kiya hai ke «rabbul mashriqayni wa rabbul maghribayni» mein «mashriqayni» se jare aur garmi ki mashriq aur «maghribayni» se jare garmi ki maghrib murad hai. «la yabghiyaani» mil nahi jate. «al-munsha'aatu» woh kashtiyan jin ka baadban oopar uthaya gaya ho (wahi door se pahar ki tarah maloom hoti hain) aur jin kashtiyon ka baadban na charhaya jaye un ko «al-munsha'aatu» nahi kahein ge. Mujahid ne kaha «kal-fakh-khaari» yani jaisa theekra banaya jata hai. «ash-shuwaazhu» aag ka shola jis mein dhuwaan ho. «fanu-haasun» peetal jo gala kar dozakhiyon ke sar par dala jaye ga un ko isi se azab diya jaye ga. «khaafa maqaama rabbihi» ka yeh matlab hai ke koi aadmi gunah karne ka qasd kare phir apne Parvardigar ko yaad kar ke is se baaz aa jaye. «mud-haammataani» bahut shadabi ki wajah se kale ya sabz ho rahe hon ge. «salsaalun» woh gara keechar jis mein rait milayi jaye woh theekri ki tarah khankhanane lage. Baazon ne kaha ke «salsaalun» bad-boodar keechar, jaise kehte hain «salla al-lahmu» yani gosht bad-boodar ho gaya, sarr gaya jaise «sar-ral baabu» darwaze band karte waqt aawaz di aur «sarsar-al baabu» aur «kabb-tuhu» ko «kabkab-tuhu» kehte hain. «fakihatun wa nakhlun wa rummaanun» yani wahan mewa ho ga aur khajoor aur anaar is aayat se baazon ne (Imam Abu Hanifa ne) yeh nikala hai ke khajoor aur anaar mewa nahi hain. Arab log to in donon ko mewon mein shumar karte hain ab raha «nakhl» aur «rummaan» ka atf «fakihatin» par to aisa hai jaise doosri aayat mein farmaya «haafizhoo alassalawati wassalatil wusta» to pehle sab namazon ki muhafazat ka hukm diya «salatil wusta» bhi in mein aa gayi phir «salatil wusta» ko atf kar ke dobara byaan kar dena is se gharz yeh hai ke is ka aur zyada khayal rakh, aise hi yahan bhi «nakhl wa rummaan» , «fakihatin» mein aa gaye thay magar un ki umdagi ki wajah se dobara un ka zikr kiya jaise is aayat mein farmaya «alam tara annallaha yasjudu lahu man fis-samawaati wa man fil ardi» phir is ke baad farmaya «wa kaseerum minan-naasi wa kaseerun haqqa alayhil azhaabu» haalan ke yeh donon «man fis-samawaati wa man fil ardi» mein aa gaye auron ne (Mujahid ya Imam Abu Hanifa ke siwa) kaha «afnaanun» ka maani shakhien daliyan hain. «wa janal jannatayni daanin» yani donon baghon ka mewa qareeb ho ga aur Hasan Basri ne kaha «fa-bi-ay-yi aalaa'i» yani is ki kaun kaun si niamaton ko aur Qatadah ne kaha «rabbikuma» mein jinn aur insan ki taraf khitab hai aur Abu Dardaa ne kaha «kulla yawmin huwa fee shaanin» ka yeh matlab hai kisi ka gunah bakhsh-ta hai, kisi ki takleef door karta hai, kisi qaum ko barhata hai kisi qaum ko ghatata hai aur Ibn Abbas razi Allahu anhuma ne kaha «barzakhun» se aar murad hai. «lil-anaami-lkhalqi naddaakhataani» khair aur barkat se yahan rehte hain. «zhul jalaali» buzurgi wala auron ne kaha. «maarijun» khalis angara (jis mein dhuwaan na ho) Arab log kehte hain «marajal ameeru ra-iyyatahu» yani hakim ne apni ra-iyyat ka khayal chhor diya ya ek ko doosra sata raha hai. Lafz «mareejun» jo Surah Qaaf mein hai. Is ka maani gadd-madd mila hua. «marajal bahrayni» yani donon darya mil gaye hain yeh «marajat daabbatuka» se nikla hai yani tu ne apna janwar chhor diya is tarah reh kar hum anqareeb tumhara khatma karein ge yahan faraghat ka maani nahi kyunke Allah Paak ko koi cheez doosri cheez ki taraf khayal karne se baaz nahi rakh sakti hai. Yeh ek muhawara hai jo sab logon mein mashhoor hai koi shakhs bekar hota hai is ko fursat hoti hai lekin darane ke liye doosre se kehta hai, achha main tere liye faraghat karoon ga yani woh khauf jab tal jaye ga to tujh ko saza doon ga.

Hum se Abdullah bin Abi al-Aswad ne byaan kiya, kaha hum se Abdul Aziz bin Abdus Samad al-Ammi ne byaan kiya, kaha hum se Abu Imran al-Jawni ne byaan kiya, un se Abu Bakr bin Abdullah bin Qays ne aur un se un ke walid (Abdullah bin Qays Abu Musa Ash'ari) ne ke Rasool Allah salla Allahu alaihi wasallam ne farmaya ke (jannat mein) do bagh hon ge jin ke bartan aur tamam doosri cheezin chaandi ki hon gi aur do doosre bagh hon ge jin ke bartan aur tamam doosri cheezin sone ke hon ge aur Jannat e Adn se jannatiyon ke apne Rabb ke deedar mein koi cheez siwaye kibriyai ki chadar ke jo is ke munh par ho gi, haail na ho gi.