Mujahid ne kaha «ha-meem» ka maani Allah ko maloom hai jaise doosri suraton mein jo huroof e muqatta-aat shuru mein aaye hain un ke mutalliq haqeeqi maani sirf Allah hi ko maloom hain . Baazon ne kaha «ha-meem» Quran ya surat ka naam hai jaise Shurayh Ibn Abi Awfa Absi is shair mein kehta hai jabke neza jang mein chalne laga . Parhta hai «ha-meem» pehle parhna tha . «at-taulu» ke maani ihsan aur fazl karna . «daakhireena» ke maani zaleel o khwar ho kar . Mujahid ne kaha «ad-ookum ilan-najaati» se iman murad hai . «laysa lahu dawatun» yani but kisi ki dua qubol nahi kar sakta . «yus-jaroona» ke maani woh dozakh ke eendhan banein ge . «tamrahoona» ke maani tum itrate thay . Aur Alaa bin Ziyad mashhoor tabiy wa mashhoor zahid logon ko dozakh se darra rahe thay , ek shakhs kehne laga logon ko Allah ki rahmat se mayus kyun karte ho ? Unhon ne kaha main logon ko Allah ki rahmat se na-umeed kaise kar sakta hoon meri kya taqat hai . Allah Paak to farmata hai «ya ibadiyallazhina asrafoo ala anfusihim la taqnatoo min rahma-tillaahi» ”Ae mere woh bando! Jinon ne apni jaanon par zulm kiya (gunah kiye) Allah ki rahmat se na-umeed na ho .“ Is ke saath Allah yun bhi farmata hai «wa annal musrifeena hum as-haabun naar» ke ”gunahgar dozakhi hain“ magar main samajh gaya tumhara matlab yeh hai ke bure kaam karte raho aur jannat ki khush-khabri tum ko milti jaye . Allah ne to Muhammad salla Allahu alaihi wasallam ko naikiyon par khush-khabri dene wala aur nafarmanon ke liye dozakh se darane wala bana kar bheja hai .

Hum se Ali bin Abdullah Madini ne byaan kiya , kaha hum se Waleed bin Muslim ne byaan kiya , kaha hum se Awzai ne byaan kiya , kaha ke mujh se Yahya bin Abi Kaseer ne byaan kiya , kaha ke mujh se Muhammad bin Ibrahim Taymi ne byaan kiya , kaha ke mujh se Urwah bin Zubayr ne byaan kiya , Aap ne byaan kiya ke main ne Abdullah bin Amr bin al-Aas razi Allahu anhuma se poocha ke Rasool Allah salla Allahu alaihi wasallam ke saath sab se zyada sakht muamla mushrikeen ne kya kiya tha ? Abdullah ne byaan kiya ke Nabi Karim salla Allahu alaihi wasallam Kaaba ke qareeb namaz parh rahe thay ke Uqbah bin Abi Muayt aaya us ne Aap ka shana mubarak pakar kar Aap ki gardan mein apna kapra lapait diya aur is kapre se Aap ka gala bari sakhti ke saath ghontne laga . Itne mein Abu Bakr Siddique razi Allahu anhu bhi aa gaye aur unhon ne is bad-bakht ka mondha pakar kar usay Nabi Karim salla Allahu alaihi wasallam se juda kiya aur kaha ke kya tum ek aise shakhs ko qatl kar dena chahte ho jo kehta hai ke mera Rabb Allah hai aur woh tumhare Rabb ke paas se apni sachayi ke liye roshan dalail bhi saath laya hai .