Hum se Abu al-Yaman ne byaan kiya , kaha hum ko Shuayb ne khabar di , un se Zuhri ne byaan kiya , kaha ke mujhe Abu Salamah bin Abdur Rahman ne khabar di aur unhein Nabi Karim salla Allahu alaihi wasallam ki zauja mutahhara Aisha razi Allahu anha ne khabar di ke jab Allah Ta'ala ne Rasool Allah salla Allahu alaihi wasallam ko hukm diya ke Nabi Karim (salla Allahu alaihi wasallam) apni azwaj ko (Aap ke samne rehne ya Aap se alaihda-gi ka) ikhtiyar dein to Aap Aisha razi Allahu anha ke paas bhi tashreef le gaye aur farmaya ke main tum se ek muamla ke mutalliq kehne aaya hoon zaroori nahi ke tum is mein jald baazi se kaam lo , apne walidain se bhi mashwara kar sakti ho . Nabi Karim salla Allahu alaihi wasallam to jaante hi thay ke mere walid kabhi Aap se judayi ka mashwara nahi de sakte . Aisha razi Allahu anha ne byaan kiya ke phir Nabi Karim salla Allahu alaihi wasallam ne farmaya ke Allah Ta'ala ka farman hai «ya ayyuhan-nabiyyu qul li-azwaajika» ke ”Ae Nabi! Apni biwiyon se farma dijiye“ aakhir aayat tak . Main ne arz kiya , lekin kis cheez ke liye mujhe apne walidain se mashwara ki zaroorat hai , khuli hui baat hai ke main Allah , us ke Rasool aur aalam e aakhirat ko chahti hoon .