Hum se Muhammad bin Musanna ne byaan kiya , kaha hum se Yahya bin Saeed Qattan ne , un se Amr bin Saeed bin Abi Husain ne , un se Ibn Abi Mulaykah ne , kaha ke Aisha razi Allahu anha ki wafat se thori der pehle , jabke woh naza ki halat mein thien , Ibn Abbas razi Allahu anhuma ne un ke paas aane ki ijazat chaahi , Aisha razi Allahu anha ne kaha ke mujhe darr hai ke kahin woh meri tareef na karne lagein . Kisi ne arz kiya ke Rasool Allah salla Allahu alaihi wasallam ke chacha-zaad bhai hain aur khud bhi izzat-dar hain (is liye Aap ko ijazat de deni chahiye) is par unhon ne kaha ke phir unhein andar bula lo . Ibn Abbas razi Allahu anhuma ne un se poocha ke Aap kis haal mein hain ? Is par unhon ne farmaya ke agar main Allah ke nazdeek achhi hoon to sab achha hi achha hai . Is par Ibn Abbas razi Allahu anhuma ne kaha ke In sha Allah Aap achhi hi rahein gi . Aap Rasool Allah salla Allahu alaihi wasallam ki zauja mutahhara hain aur Aap ke siwa Nabi Karim salla Allahu alaihi wasallam ne kisi kunwari aurat se nikah nahi farmaya aur Aap ki bara'at (Quran Majeed mein) aasman se nazil hui . Ibn Abbas razi Allahu anhuma ke tashreef le jaane ke baad Aap ki khidmat mein Ibn Zubayr razi Allahu anhuma hazir huay . Muhtarma ne in se farmaya ke abhi Ibn Abbas aaye thay aur meri tareef ki , main to chahti hoon ke kaash main ek bholi bisri gum-naam hoti .