Hum se Muhammad bin Kaseer ne byaan kiya , kaha hum ko Sufyan Sawri ne khabar di , unhein Aamash ne , unhein Abu al-Duha ne , unhein Masrooq ne aur un se Khabbab bin Aratt razi Allahu anhu ne byaan kiya ke main Makkah mein lohaar tha aur Aas bin Wa'il Sahmi ke liye main ne ek talwar banayi thi . Meri mazdoori baqi thi is liye ek din main is ko maangne aaya to kehne laga ke is waqt tak nahi doon ga jab tak tum Muhammad salla Allahu alaihi wasallam se phir nahi jao ge . Main ne kaha ke main Nabi Karim salla Allahu alaihi wasallam se hargiz nahi phiroon ga yahan tak ke Allah tujhe maar de aur phir zinda kar de aur woh kehne laga ke jab Allah Ta'ala mujhe maar kar dobara zinda kar de ga to mere paas is waqt bhi maal o aulad ho gi . Aur isi waqt tum apni mazdoori mujh se le lena . Is par Allah Ta'ala ne yeh aayat nazil ki «afara'ayt-allazhi kafara bi-ayaatina wa qaala la-ootayanna maalan wa waladan * attala'al ghayba amittakhazha indar-rahmaani ahdan» ke ”bhala tu ne is shakhs ko bhi dekha jo hamari aayaton ka inkar karta hai aur kehta hai ke mujhe to maal o aulad mil kar hi rahein ge to kya yeh ghaib par muttala ho gaya hai ya is ne Khuday-e-Rahman se koi waada le liya hai .“ «ahdun» ka maani mazboot iqrar . Ubaydullah Ashjai ne bhi is hadees ko Sufyan Sawri se riwayat kiya hai lekin is mein talwar banane ka zikr nahi hai na ahad ki tafseer mazkoor hai .