Hum se Muhammad bin Nadr ne byaan kiya , kaha hum se Ubaydullah bin Maaz ne byaan kiya , kaha hum se hamare walid ne byaan kiya , kaha hum se Shubah ne byaan kiya , un se Sahib al-Ziyadi Abdul Hameed ne aur un hon ne Anas bin Malik razi Allahu anhu se suna , un hon ne byaan kiya ke Abu Jahl ne kaha tha ke Ae Allah! Agar yeh kalam teri taraf se waqayi haq hai to hum par aasman se patthar barsa de ya phir koi aur hi azab le aa . Is par yeh aayat nazil hui «wa ma kanallahu liyuazzibahum wa anta feehim wa ma kanallahu muazzibahum wa hum yastaghfiroona * wa ma lahum alla yuazzibahumullahu wa hum yasuddoona anil masjidil harami» ”haalan ke Allah aisa nahi kare ga ke unhein azab de is haal mein ke Aap in mein maujood hon aur na Allah un par azab laye ga . Is haal mein ke woh istighfar kar rahe hon . In logon ko Allah kyun na azab kare jin ka haal yeh hai ke woh Masjid al-Haram se rokte hain .“ Aakhir aayat tak .