«yastanbitoonahu» ka maani nikal lete hain . «haseeban» ka maani kafi hai . «illa inasan» se be-jaan cheezin murad hain patthar mitti waghaira . «mareedan» ka maani shareer . «falyubattikunna» , «battakahu» se nikla hai yani is ko kaat daalo . «qeelan» aur «qaulan» donon ke ek hi maani hain . «taba'a» ka maani mahr kar di .

Hum se Adam bin Abi Iyas ne byaan kiya , kaha hum se Shubah ne byaan kiya , kaha hum ko Mugheerah bin Numan ne khabar di , unhon ne kaha ke main ne Saeed bin Jubayr se suna , unhon ne byaan kiya ke ulema e Kufa ka is aayat ke baare mein ikhtilaf ho gaya tha . Chunanche main Ibn Abbas razi Allahu anhuma ki khidmat mein is ke liye safar kar ke gaya aur un se is ke mutalliq poocha . Unhon ne farmaya ke yeh aayat «wa man yaqtul mominan mutammidan fajazauhu jahannamu» ”aur jo koi Musalman ko jaan boojh kar qatl kare is ki saza dozakh hai .“ Nazil hui aur is baab ki yeh sab se aakhri aayat hai isay kisi aayat ne mansookh nahi kiya hai .