Hum se Abu al-Yaman ne byaan kiya , kaha hum ko Shuayb ne khabar di , un se Zuhri ne byaan kiya , unhein Urwah bin Zubayr ne khabar di aur unhein Usamah bin Zayd razi Allahu anhuma ne khabar di ke Rasool Allah salla Allahu alaihi wasallam ek gadhe ki pusht par Fadak ki bani hui ek moti chadar rakhne ke baad sawar huay aur Usamah bin Zayd razi Allahu anhuma ko apne peeche bithaya . Aap salla Allahu alaihi wasallam Banu Haris bin Khazraj mein Saad bin Ubadah razi Allah ki mizaj pursi ke liye tashreef le ja rahe thay . Yeh jang e Badr se pehle ka waqia hai . Rasta mein ek majlis se Aap guzre jis mein Abdullah bin Ubayy bin Salool (munafiq) bhi maujood tha , yeh Abdullah bin Ubayy ke zahiri Islam laane se bhi pehle ka qissa hai . Majlis mein Musalman aur mushrikeen yani but-parast aur Yahudi sab hi tarah ke log thay , unhi mein Abdullah bin Rawaha razi Allahu anhu bhi thay . Sawari ki (taapon se gard uri aur) majlis walon par pari to Abdullah bin Ubayy ne chadar se apni naak band kar li aur bataur tehqeer kehne laga ke hum par gard na urao , itne mein Rasool Allah salla Allahu alaihi wasallam bhi qareeb pahunch gaye aur unhein salam kiya , phir Aap sawari se utar gaye aur majlis walon ko Allah ki taraf bulaya aur Quran ki aayatein parh kar sunayein . Is par Abdullah bin Ubayy bin Salool kehne laga , jo kalam Aap ne parh kar sunaya hai , is se umdah koi kalam nahi ho sakta . Agarchay yeh kalam bahut achha , phir bhi hamari majlison mein aa aa kar Aap hamain takleef na diya karein , apne ghar baithein , agar koi Aap ke paas jaye to usay apni baatein sunaya karein . (yeh sun kar) Abdullah bin Rawaha razi Allahu anhu ne kaha , zaroor ya Rasool Allah! Aap hamari majlison mein tashreef laya karein , hum isi ko pasand karte hain . Is ke baad Musalman , mushrikeen aur Yahudi aapas mein ek doosre ko bura bhala kehne lage aur qareeb tha ke fasad aur larai tak ki naubat pahunch jati lekin Aap ne unhein khamosh aur thanda kar diya aur aakhir sab log khamosh ho gaye , phir Aap salla Allahu alaihi wasallam apni sawari par sawar ho kar wahan se chale aaye aur Saad bin Ubadah razi Allahu anhu ke yahan tashreef le gaye . Nabi Karim salla Allahu alaihi wasallam ne Saad bin Ubadah razi Allahu anhu se bhi is ka zikr kiya ke Saad! Tum ne nahi suna , Abu Hubab , Aap ki murad Abdullah bin Ubayy bin Salool se thi , kya keh raha tha ? Is ne is tarah ki baatein ki hain . Saad bin Ubadah razi Allahu anhu ne arz kiya: ya Rasool Allah! Aap usay maaf farma dein aur is se darguzar kar dein . Is zaat ki qasam! Jis ne Aap par kitab nazil ki hai Allah ne Aap ke zariye woh haq bheja hai jo is ne Aap par nazil kiya hai . Is shehar (Madinah) ke log (pehle) is par muttafiq ho chuke thay ke is (Abdullah bin Ubayy) ko taaj pehna dein aur (shahi) amama is ke sar par baandh dein lekin jab Allah Ta'ala ne is haq ke zariye jo Aap ko is ne ata kiya hai , is baatil ko rok diya to ab woh chir gaya hai aur is wajah se woh muamla is ne Aap ke saath kiya jo Aap ne mulahiza farmaya hai . Aap ne usay maaf kar diya . Nabi Karim salla Allahu alaihi wasallam aur sahabah razi Allahu anhum mushrikeen aur Ahl e Kitab se darguzar kiya karte thay aur un ki aziyaton par sabr kiya karte thay . Isi ke baare mein yeh aayat nazil hui ”aur yaqeenan tum bahut si dil-aazari ki baatein un se bhi suno ge , jinhein tum se pehle kitab mil chuki hai aur un se bhi jo mushrik hain aur agar tum sabr karo aur taqwa ikhtiyar karo to yeh bare azm o hausla ki baat hai“ aur Allah Ta'ala ne farmaya ”bahut se Ahl e Kitab to dil hi se chahte hain ke tumhein iman (le aane) ke baad phir se kafir bana lein , hasad ki raah se jo un ke dilon mein hai .“ Aakhir aayat tak . Jaisa ke Allah Ta'ala ka hukm tha Nabi Karim salla Allahu alaihi wasallam hamesha kuffar ko maaf kar diya karte thay . Aakhir Allah Ta'ala ne Aap ko un ke saath jang ki ijazat de di aur jab Aap ne Ghazwa Badr kiya to Allah Ta'ala ki mansha ke mutabiq Quraysh ke kafir sardar is mein maarey gaye to Abdullah bin Ubayy bin Salool aur is ke doosre mushrik aur but-parast sathiyon ne aapas mein mashwara kar ke in sab ne bhi Nabi Karim salla Allahu alaihi wasallam se Islam par bai'at kar li aur zahiran Islam mein dakhil ho gaye .