Ikrimah ne kaha ke alfaz «jibr» , «meek» aur «saraf» teenon ke maani banda ke hain aur lafz «eel» Ibrani zaban mein «Allah» ke maani mein hai .

Hum se Abdullah bin Muneer ne byaan kiya , unhon ne Abdullah bin Bakr se suna , us ne kaha ke mujh se Humayd ne aur un se Anas razi Allahu anhu ne byaan kiya ke jab Abdullah bin Salam razi Allahu anhu (jo Yahud ke bare aalim thay) ne Rasool Allah salla Allahu alaihi wasallam ki (Madinah) tashreef laane ki khabar suni to woh apne bagh mein phal torr rahe thay . Woh isi waqt Nabi Karim salla Allahu alaihi wasallam ki khidmat mein hazir huay aur arz kiya ke main Aap se aisi teen cheezon ke mutalliq poochta hoon , jinhein Nabi ke siwa aur koi nahi jaanta . Batlaiye! Qayamat ki nishaniyon mein sab se pehli nishani kya hai ? Ahl e Jannat ki dawat ke liye sab se pehle kya cheez pesh ki jaye gi ? Bacha kab apne baap ki surat mein ho ga aur kab apni maan ki surat par ? Nabi Karim salla Allahu alaihi wasallam ne farmaya ke mujhe abhi Jibraeel ne aa kar un ke mutalliq bataya hai . Abdullah bin Salam bolay Jibraeel alaihissalam ne! Farmaya: haan , Abdullah bin Salam ne kaha ke woh to Yahudiyon ke dushman hain . Is par Aap salla Allahu alaihi wasallam ne yeh aayat tilawat ki «man kana aduwwal lijibreela fa-innahu nazzalahu ala qalbika» aur un ke sawalat ke jawab mein farmaya , Qayamat ki sab se pehli nishani ek aag ho gi jo insanon ko Mashriq se Maghrib ki taraf jama kar laye gi . Ahl e Jannat ki dawat mein jo khana sab se pehle pesh kiya jaye ga woh machhli ke jigar ka barha hua hissa ho ga aur jab mard ka pani aurat ke pani par ghalba kar jata hai to bacha baap ki shakal par hota hai aur jab aurat ka pani mard ke pani par ghalba kar jata hai to bacha maan ki shakal par hota hai . Abdullah bin Salam razi Allahu anhu bol uthay «ash-hadu alla ilaha illallah , wa ash-hadu annaka Rasoolullah» . ”Main gawahi deta hoon ke Allah ke siwa koi mabood nahi aur gawahi deta hoon ke Aap Allah ke Rasool hain .“ (phir arz kiya) ya Rasool Allah! Yahudi bari bohtan-baaz qaum hai , agar is se pehle ke Aap mere mutalliq un se kuch poochein , unhein mere Islam ka pata chal gaya to mujh par bohtan tarashiyan shuru kar dein ge . Baad mein jab Yahudi aaye to Nabi Karim salla Allahu alaihi wasallam ne daryaft farmaya ke Abdullah tumhare yahan kaise aadmi samjhe jate hain ? Woh kehne lage , hum mein sab se behtar aur hum mein sab se behtar ke bete! Hamare sardar aur hamare sardar ke bete hain . Aap salla Allahu alaihi wasallam ne farmaya ke agar woh Islam le aayein phir tumhara kya khayal ho ga ? Kehne lage , Allah Ta'ala is se unhein panah mein rakkhe . Itne mein Abdullah bin Salam razi Allahu anhu ne zahir ho kar kaha «ash-hadu alla ilaha illallah , wa anna Muhammadan Rasoolullah» . Ke ”main gawahi deta hoon ke Allah ke siwa aur koi mabood nahi aur gawahi deta hoon ke Muhammad Allah ke sache Rasool hain .“ Ab wahi Yahudi un ke baare mein kehne lage ke yeh hum mein sab se bad-tar hai aur sab se bad-tar shakhs ka beta hai aur un ki toheen shuru kar di . Abdullah razi Allahu anhu ne kaha: ya Rasool Allah! Yahi woh cheez thi jis se main darta tha .