Hum se Ubaid bin Ismail ne bayan kiya , kaha hum se Abu Usama ne Hisham ke wastay se , unhon ne apne walid se , unhon ne Aisha raziyallahu anha se ke Arab ke kisi qabeela ki ek kali londi thi . Unhon ne isay azad kar diya tha aur woh unhein ke sath rehti thi . Is ne bayan kiya ke ek dafa un ki ek larki jo dulhan thi nahane ko nikli , is ka kamar band surkh tasmon ka tha is ne woh kamar band utar kar rakh diya ya is ke badan se gir gaya . Phir is taraf se ek cheel guzri jahan kamar band para tha . Cheel isay surkh rang ki wajah se gosht samajh kar jhapat le gayi . Baad mein qabeela walon ne isay bohot talash kiya , lekin kahin na mila . Un logon ne is ki tuhmat mujh par laga di aur meri talashi leni shuru kar di , yahan tak ke unhon ne is ki sharmgah tak ki talashi li . Is ne bayan kiya ke Allah ki qasam mein un ke sath isi halat mein khari thi ke wahi cheel aayi aur is ne un ka woh kamar band gira diya . Woh un ke samne hi gira . Mein ne isay dekh kar kaha yahi to tha jis ki tum mujh par tuhmat lagate thay . Tum logon ne mujh par is ka ilzam lagaya tha halanke mein is se pak thi . Yahi to hai woh kamar band! Is londi ne kaha ke is ke baad mein Rasool Allah salla Allahu alaihi wa sallam ki khidmat mein hazir hui aur Islam layi . Aisha raziyallahu anha ne bayan kiya ke is ke liye masjid Nabwi mein ek bara kheema laga diya gaya . Ya yeh kaha ke chhota sa kheema laga diya gaya . Aisha raziyallahu anha ne bayan kiya ke woh londi mere pas aati aur mujh se batein kiya karti thi . Jab bhi woh mere pas aati to yeh zaroor kehti ke kamar band ka din hamare Rab ki ajeeb nishaniyon mein se hai . Isi ne mujhe kufr ke mulk se nijat di . Aisha raziyallahu anha farmati hain ke mein ne is se kaha , aakhir baat kya hai ? Jab bhi tum mere pas baithti ho to yeh baat zaroor kehti ho . Aap ne bayan kiya ke phir is ne mujhe yeh qissa sunaya .