Hum se Abu al-Yaman ne byaan kiya , kaha hum ko Shuayb ne khabar di , unhein Abdullah bin Abi Husain ne , kaha hum ko Nafi bin Jubayr ne aur un se Ibn Abbas razi Allahu anhuma ne byaan kiya ke Nabi Karim salla Allahu alaihi wasallam ke ahad mein Musaylamah Kazzab aaya , is dawa ke saath ke agar Muhammad salla Allahu alaihi wasallam mujhe apne baad (apna naib o khaleefa) bana dein to main un ki ittiba kar loon . Is ke saath us ki qaum (Banu Hanifah) ka bahut bara lashkar tha . Nabi Karim salla Allahu alaihi wasallam is ki taraf tableegh ke liye tashreef le gaye . Aap salla Allahu alaihi wasallam ke saath Sabit bin Qays bin Shammas razi Allahu anhu bhi thay . Aap ke hath mein khajoor ki ek tehni thi . Jahan Musaylamah apni fauj ke saath parao kiye huay tha , Aap wahin ja kar thehar gaye aur Aap ne us se farmaya agar tu mujh se yeh tehni maange ga to main tujhe yeh bhi nahi doon ga aur tu Allah ke is faisle se aage nahi barh sakta jo tere baare mein pehle hi ho chuka hai . Tu ne agar meri itaat se rugardani ki to Allah Ta'ala tujhe halak kar de ga . Mera to khayal hai ke tu wahi hai jo mujhe khwab mein dikhaya gaya tha . Ab teri baaton ka jawab meri taraf se Sabit bin Qays dein ge , phir Aap salla Allahu alaihi wasallam wapas tashreef laye .