Hum se Abu Naeem ne byaan kiya , kaha hum se Sufyan ne byaan kiya un se Abu Sakhrah ne , un se Safwan bin Muhriz Mazni ne aur un se Imran bin Husain ne byaan kiya ke Banu Tamim ke chand logon ka (ek wafd) Nabi Karim salla Allahu alaihi wasallam ki khidmat mein hazir hua to Aap salla Allahu alaihi wasallam ne un se farmaya ”Ae Banu Tamim! Bisharat qabool karo .“ Woh kehne lage ke bisharat to Aap hamain de chuke , kuch maal bhi dijiye . Un ke is jawab par Nabi Karim salla Allahu alaihi wasallam ke chehra mubarak par nagowari ka asar dekha gaya , phir Yaman ke chand logon ka ek (wafd) Nabi Karim salla Allahu alaihi wasallam ki khidmat mein hazir hua to Aap salla Allahu alaihi wasallam ne un se farmaya ke Banu Tamim ne bisharat nahi qabool ki , tum qabool kar lo . Unhon ne arz kiya: ya Rasool Allah! Hum ko bisharat qabool hai .