Hum se Ali bin Abdullah Madini ne byaan kiya , kaha hum se Azhar bin Saad Samman ne byaan kiya aur un se Abdullah bin Aun ne , unhein Hisham bin Zayd bin Anas ne khabar di aur un se Anas razi Allahu anhu ne byaan kiya ke Ghazwa Hunayn mein jab qabila Hawazin se jang shuru hui to Nabi Karim salla Allahu alaihi wasallam ke saath das hazar fauj thi . Quraysh ke woh log bhi saath thay jinhein Fatah Makkah ke baad Nabi Karim salla Allahu alaihi wasallam ne chhor diya tha phir sab ne peeth pher li . Aap salla Allahu alaihi wasallam ne pukara: Ae Ansariyo! Unhon ne jawab diya ke hum hazir hain , ya Rasool Allah! Aap ke har hukm ki tameel ke liye hum hazir hain . Hum Aap ke samne hain . Phir Aap salla Allahu alaihi wasallam apni sawari se utar gaye aur Aap salla Allahu alaihi wasallam ne farmaya ke main Allah ka banda aur us ka Rasool hoon phir mushrikeen ki haar ho gayi . Jin logon ko Aap salla Allahu alaihi wasallam ne Fatah Makkah ke baad chhor diya tha aur Muhajireen ko Nabi Karim salla Allahu alaihi wasallam ne diya lekin Ansar ko kuch nahi diya . Is par Ansar razi Allahu anhum ne apne gham ka izhaar kiya to Aap ne unhein bulaya aur ek khaime mein jama kiya phir farmaya ke tum is par raazi nahi ho ke doosre log bakri aur oont apne saath le jayein aur tum Rasool Allah salla Allahu alaihi wasallam ko apne saath le jao . Nabi Karim salla Allahu alaihi wasallam ne farmaya ke agar log kisi wadi ya ghati mein rahein aur Ansar doosri ghati mein rahein to main Ansar ki ghati ko ikhtiyar karoon ga .