Hum se Khallad Bin Yahya ne bayan kiya, kaha hum se Abdul Wahid Bin Aiman ne bayan kiya, un se in ke walid Aiman Habshi ne bayan kiya ke mein Jabir Radi Allahu Anhu ki khidmat mein hazir hua to unhon ne bayan kiya ke hum Ghazwa Khandaq ke mauqe par khandaq khod rahe thay ke ek bahut sakht qism ki chattan nikli (jis par kadal aur phawray ka koi asar nahi hota tha is liye khandaq ki khudayi mein rukawat paida ho gayi) Sahaba (Radi Allahu Anhum) Rasul Allah Sallallahu Alaihi Wasallam ki khidmat mein hazir hue aur Aap se arz kiya ke khandaq mein ek chattan zahir ho gayi hai. Aap Sallallahu Alaihi Wasallam ne farmaya ke mein andar utarta hoon. Chunancha Aap kharay hue aur is waqt (bhook ki shiddat ki wajah se) Aap ka pait patthar se bandha hua tha. Aap Sallallahu Alaihi Wasallam ne kadal apne hath mein li aur chattan par is se mara. Chattan (ek hi zarb mein) baalu ke dher ki tarah beh gayi. Mein ne arz kiya: Ya Rasul Allah! Mujhe ghar jane ki ijazaat dijiye. (Ghar aa kar) mein ne apni biwi se kaha ke aaj mein ne Nabi Kareem Sallallahu Alaihi Wasallam ko (faqon ki wajah se) is halat mein dekha ke sabr na ho saka. Kya tumhare pas (khane ki) koi cheez hai? Unhon ne bataya ke haan kuch jao hain aur ek bakri ka baccha. Mein ne bakri ke baccha ko zibah kiya aur meri biwi ne jao peese. Phir gosht ko hum ne chulhay par handi mein rakha aur mein Rasul Allah Sallallahu Alaihi Wasallam ki khidmat mein hazir hua. Aata gundha ja chuka tha aur gosht chulhay par pakne ke qareeb tha. Nabi Kareem Sallallahu Alaihi Wasallam se mein ne arz kiya ghar khane ke liye mukhtasar khana tayyar hai. Ya Rasul Allah! Aap apne sath ek do aadmiyon ko le kar tashreef le chalein. Aap Sallallahu Alaihi Wasallam ne daryaft farmaya ke kitna hai? Mein ne Aap ko sab kuch bata diya. Aap Sallallahu Alaihi Wasallam ne farmaya ke ye to bahut hai aur nihayait umda-o-tayyab hai. Phir Aap Sallallahu Alaihi Wasallam ne farmaya ke apni biwi se keh do ke chulhay se handi na utarein aur na tanoor se roti nikalein mein abhi aa raha hoon. Phir sahaba se farmaya ke sab log chalein. Chunancha tamam ansar-o-muhajireen tayyar ho gaye. Jab Jabir Radi Allahu Anhu ghar pahunche to apni biwi se unhon ne kaha ab kya hoga? Rasul Allah Sallallahu Alaihi Wasallam to tamam muhajireen-o-ansar ko sath le kar tashreef la rahe hain. Unhon ne pucha, Nabi Kareem Sallallahu Alaihi Wasallam ne Aap se kuch pucha bhi tha? Jabir Radi Allahu Anhu ne kaha ke haan. Aap Sallallahu Alaihi Wasallam ne sahaba se farmaya ke andar dakhil ho jao lekin azdaham na hone paye. Is ke baad Aap Sallallahu Alaihi Wasallam roti ka choora karne lage aur gosht is par dalne lage. Handi aur tanoor dono dhake hue thay. Aap Sallallahu Alaihi Wasallam ne ise liya aur sahaba ke qareeb kar diya. Phir Aap ne gosht aur roti nikali. Is tarah Aap Sallallahu Alaihi Wasallam barabar roti choora karte jate aur gosht is mein dalte jate. Yahan tak ke tamam sahaba shikm ser ho gaye aur khana bach bhi gaya. Aakhir mein Aap Sallallahu Alaihi Wasallam ne (Jabir Radi Allahu Anhu ki biwi se) farmaya ke ab ye khana tum khud khao aur logon ke yahan hadiya mein bhejo kyunke log aaj kal faqa mein mubtala hain
.