Hum se Abu Ma'mar ne bayan kiya, kaha hum se Abdul Waris ne bayan kiya, un se Abdul Aziz ne bayan kiya aur un se Anas Radi Allahu Anhu ne bayan kiya ke Ghazwa Uhud mein jab musalman Nabi Kareem Sallallahu Alaihi Wasallam ke pas se muntashir ho kar paspa ho gaye to Talha Radi Allahu Anhu Nabi Kareem Sallallahu Alaihi Wasallam ki apne chamre ki dhaal se hifazat kar rahe thay. Abu Talha Radi Allahu Anhu bare teer andaz thay aur kaman khoob khinch kar teer chalaya karte thay. Is din unhon ne do ya teen kamanen tor di thin. Musalmanon mein se koi agar teer ka tarkash liye guzarta to Nabi Kareem Sallallahu Alaihi Wasallam in se farmate ye teer Abu Talha ke liye yahin rakhte jao. Anas Radi Allahu Anhu ne bayan kiya ke Aap Sallallahu Alaihi Wasallam mushrikeen ko dekhne ke liye sar utha kar jhankte to Abu Talha Radi Allahu Anhu arz karte: Mere maan baap Aap par fida hon, sar-e-mubarak upar na uthaiye kahin aisa na ho ke udhar se koi teer Aap ko lag jaye. Meri gardan Aap se pehle hai aur mein ne dekha ke jung mein Aisha Bint-e-Abi Bakr Radi Allahu Anha aur (Anas Radi Allahu Anhu ki walida) Umm-e-Sulaim Radi Allahu Anha apne kapre uthaye hue hain ke in ki pindliyan nazar aa rahi thin aur mashkize apni peethon par liye dor rahi hain aur is ka pani zakhmi musalmanon ko pila rahi hain phir (jab is ka pani khatam ho jata hai) to wapas aati hain aur mashk bhar kar phir le jati hain aur musalmanon ko pilati hain. Is din Abu Talha Radi Allahu Anhu ke hath se do ya teen martaba talwar gir gayi thi
.