Hum se Ali Bin Abdullah Madini ne kaha, kaha hum se Sufyan Bin Uyainah ne bayan kiya, un se Amr Bin Dinar ne bayan kiya ke mein ne Jabir Bin Abdullah Ansari (Radi Allahu Anhuma) se suna, wo bayan karte thay ke Rasul Allah Sallallahu Alaihi Wasallam ne farmaya ”Kaab Bin Ashraf ka kaam kaun tamam kare ga? Wo Allah aur is ke Rasul ko bahut sata raha hai.“ Is par Muhammad Bin Maslama Ansari Radi Allahu Anhu kharay hue aur arz kiya: Ya Rasul Allah! Kya Aap ijazaat dein ge ke mein ise qatl kar aaon? Aap ne farmaya ”Haan mujhko ye pasand hai.“ Unhon ne arz kiya, phir Aap mujhe ijazaat inayait farmaiye ke mein is se kuch baatein kahoon Aap ne unhein ijazaat de di. Ab Muhammad Bin Maslama Radi Allahu Anhu Kaab Bin Ashraf ke pas aaye aur is se kaha, ye shakhs (ishara Aap Sallallahu Alaihi Wasallam ki taraf tha) hum se sadqa mangta rehta hai aur is ne humein thaka mara hai. Is liye mein tum se qarza lene aaya hoon. Is par Kaab ne kaha, abhi aage dekhna, Khuda ki qasam! Bilkul ukta jao ge. Muhammad Bin Maslama Radi Allahu Anhu ne kaha, kyunke hum ne bhi ab in ki ittaba kar li hai. Is liye jab tak ye na khul jaye ke in ka anjam kya hota hai, unhein chorna bhi munasib nahi. Tum se ek wasaq ya (ravi ne bayan kiya ke) do wasaq ghalla qarz lene aaya hoon. Aur hum se Amr Bin Dinar ne ye hadees kai dafa bayan ki lekin ek wasaq ya do wasaq ghalle ka koi zikr nahi kiya. Mein ne un se kaha ke hadees mein ek ya do wasaq ka zikr hai? Unhon ne kaha ke mera bhi khayal hai ke hadees mein ek ya do wasaq ka zikr aaya hai. Kaab Bin Ashraf ne kaha, haan, mere pas kuch girwi rakh do. Unhon ne pucha, girwi mein tum kya chahte ho? Is ne kaha, apni aurton ko rakh do. Unhon ne kaha ke tum Arab ke bahut khoobsurat mard ho. Hum tumhare pas apni aurten kis tarah girwi rakh sakte hain. Is ne kaha, phir apne bachon ko girwi rakh do. Unhon ne kaha, hum bachon ko kis tarah girwi rakh sakte hain. Kal unhein isi par galiyan di jayein gi ke ek ya do wasaq ghalle par ise rehan rakh diya gaya tha, ye to bari be-ghairti hogi. Albatta hum tumhare pas apne «Al-La'mah» girwi rakh sakte hain. Sufyan ne kaha ke murad is se hathiyar thay. Muhammad Bin Maslama Radi Allahu Anhu ne is se dubara milne ka wada kiya aur raat ke waqt is ke yahan aaye. In ke sath Abu Naila bhi maujood thay wo Kaab Bin Ashraf ke razayi bhai thay. Phir is ke qila ke pas ja kar unhon ne awaz di. Wo bahar aane laga to is ki biwi ne kaha ke is waqt (itni raat gaye) kahan bahar ja rahe ho? Is ne kaha, wo to Muhammad Bin Maslama aur mera bhai Abu Naila hai. Amr ke siwa (dusre ravi) ne bayan kiya ke is ki biwi ne is se kaha tha ke mujhe to ye awaz aisi lagti hai jaise is se khoon tapak raha ho. Kaab ne jawab diya ke mere bhai Muhammad Bin Maslama aur mere razayi bhai Abu Naila hain. Shareef ko agar raat mein bhi neza bazi ke liye bulaya jaye to wo nikal parta hai. Ravi ne bayan kiya ke jab Muhammad Bin Maslama andar gaye to in ke sath do aadmi aur thay. Sufyan se pucha gaya ke kya Amr Bin Dinar ne in ke naam bhi liye thay? Unhon ne bataya ke baaz ka naam liya tha. Amr ne bayan kiya ke wo aaye to in ke sath do aadmi aur thay aur Amr Bin Dinar ke siwa (ravi ne) Abu Abs Bin Jabr, Harith Bin Aus aur Abbad Bin Bishr naam bataye thay. Amr ne bayan kiya ke wo apne sath do aadmiyon ko laye thay aur unhein ye hidayait ki thi ke jab Kaab aaye to mein is ke (sar ke) baal hath mein le loonga aur ise soonghne lagoonga. Jab tumhein andaza ho jaye ke mein ne is ka sar poori tarah apne qabza mein le liya hai to phir tum tayyar ho jana aur ise qatl kar dalna. Amr ne ek martaba bayan kiya ke phir mein is ka sar soonghonga. Aakhir Kaab chadar lipeyte hue bahar aaya. Is ke jism se khushbu phooti parti thi. Muhammad Bin Maslama Radi Allahu Anhu ne kaha, aaj se zyada umda khushbu mein ne kabhi nahi soonghi thi. Amr ke siwa (dusre ravi) ne bayan kiya ke Kaab is par bola, mere pas Arab ki wo aurat hai jo har waqt itar mein basi rehti hai aur husn-o-jamal mein bhi is ki koi nazeer nahi. Amr ne bayan kiya ke Muhammad Bin Maslama Radi Allahu Anhu ne is se kaha, kya tumhare sar ko soonghne ki mujhe ijazaat hai? Is ne kaha, soongh sakte ho. Ravi ne bayan kiya ke Muhammad Bin Maslama Radi Allahu Anhu ne is ka sar soongha aur in ke baad in ke sathiyon ne bhi soongha. Phir unhon ne kaha, kya dubara soonghne ki ijazaat hai? Is ne is martaba bhi ijazaat de di. Phir jab Muhammad Bin Maslama Radi Allahu Anhu ne ise poori tarah apne qabu mein kar liya to apne sathiyon ko ishara kiya ke tayyar ho jao. Chunancha unhon ne ise qatl kar diya aur Nabi Kareem Sallallahu Alaihi Wasallam ki khidmat mein hazir ho kar is ki ittela di
.