Hum se Yahya Bin Sulaiman ne bayan kiya, kaha mujh se Abdullah Bin Wahab ne bayan kiya, kaha ke mujh se Umar Bin Muhammad ne bayan kiya, kaha mujh ko mere dada Zaid Bin Abdullah Bin Amr ne khabar di, un se un ke walid Abdullah Bin Umar Radi Allahu Anhuma ne bayan kiya ke Umar Radi Allahu Anhu (Islam lane ke baad Quraish se) dare hue ghar mein baithe hue thay ke Abu Amr Aas Bin Wail Sahmi andar aaya, ek dhari dar chadar aur reshmi kurta pehne hue tha. Wo qabila Banu Sahm se tha jo zamana-e-jahiliyat mein hamare haleef thay. Aas ne Umar Radi Allahu Anhu se kaha kya baat hai? Umar Radi Allahu Anhu ne kaha ke tumhari qaum Banu Sahm wale kehte hain ke agar mein musalman hua to wo mujh ko maar dalein ge. Aas ne kaha ”tumhein koi nuqsan nahi pahuncha sakta“ jab Aas ne ye kalma keh diya to Umar Radi Allahu Anhu ne kaha ke phir mein bhi apne ko aman mein samajhta hoon. Is ke baad Aas bahar nikla to dekha ke maidan logon se bhar gaya hai. Aas ne poocha kidhar ka rukh hai? Logon ne kaha hum Ibn Khattab ki khabar lene jaate hain jo bedeen ho gaya hai. Aas ne kaha ise koi nuqsan nahi pahuncha sakta, ye sunte hi log laut gaye
.