Mujh se Farwah Bin Abi-ul-Maghra ne bayan kiya, kaha hum ko Ali Bin Mushir ne khabar di, unhein Hisham ne, unhein un ke walid ne aur un se Aisha Radi Allahu Anha ne bayan kiya ke ek kali aurat jo kisi Arab ki bandi thi Islam layi aur masjid mein is ke rehne ke liye ek kothri thi. Aisha Radi Allahu Anha ne bayan kiya wo hamare yahan aaya karti aur batein kiya karti thi, lekin jab baton se farigh ho jati to wo ye sher parhti " Aur haar wala din bhi hamare Rabb ke ajaib-e-qudrat mein se hai, ke isi ne (bafazlihi) kufr ke sheher se mujhe churaya. " Is ne jab kai martaba ye sher parha to Aisha Radi Allahu Anha ne is se daryaft kiya ke haar wale din ka qissa kya hai? Is ne bayan kiya ke mere malkon ke gharane ki ek larki (jo nayi dulhan thi) laal chamre ka ek haar bandhe hue thi. Wo bahar nikli to ittifaq se wo gir gaya. Ek cheel ki is par nazar pari aur wo ise gosht samajh kar utha le gayi. Logon ne mujh par is ki chori ki tuhmat lagayi aur mujhe sazayein deni shuru kein. Yahan tak ke meri sharmgah ki bhi talashi li. Khair wo abhi mere charon taraf jama hi thay aur mein apni museebat mein mubtala thi ke cheel aayi aur hamare saron ke bilkul upar urne lagi. Phir is ne wahi haar neeche gira diya. Logon ne ise utha liya to mein ne un se kaha isi ke liye tum log mujhe itteham laga rahe thay halankay mein begunaah thi
.