Mujh se Ismail Bin Khalil ne bayan kiya, kaha hum se Salama Bin Rajaa ne, unhein Hisham Bin Urwah ne, unhein un ke walid ne aur un se Aisha Radi Allahu Anha ne bayan kiya ke Uhud ki larai mein jab mushrikeen haar chuke to Iblees ne chilla kar kaha: Ay Allah ke bando! Peeche walon ko (qatl karo) chunanche aage ke musalman peeche walon par pal pare aur unhein qatl karna shuru kar diya. Huzaifah Radi Allahu Anhu ne jo dekha to un ke walid (Yaman Radi Allahu Anhu) bhi wahin mojood thay unhon ne pukar kar kaha: Ay Allah ke bando ye to mere walid hain mere walid! Aisha Radi Allahu Anha ne bayan kiya: Allah ki qasam! Is waqt tak log wahan se nahi hate jab tak unhein qatl na kar liya. Huzaifah Radi Allahu Anhu ne sirf itna kaha Allah tumhari maghfirat kare. (Hisham ne bayan kiya ke) Allah ki qasam! Huzaifah Radi Allahu Anhu barabar ye kalma duaiya kehte rahe (ke Allah un ke walid par hamla karne walon ko bakhshe jo ke mahaz ghalat fehmi ki wajah se ye harkat kar baithe) ye dua marte dam tak karte rahe
.