Hum se Malik bin Ismail ne bayan kiya, kaha hum se Israil ne bayan kiya, un se Abu Ishaq ne, un se Bara bin Azib Radi Allahu Anhu ne bayan kiya ke Sulh-e-Hudaibiyah ke din hum chaudah so ki tadad mein thay. Hudaibiyah ek kunwein ka naam hai hum ne is se itna pani khincha ke is mein ek qatra bhi baqi na raha (jab Rasoolullah Sallallahu Alaihi Wa Sallam ko is ki khabar hui to Aap tashreef laye) aur kunwein ke kinare baith kar pani ki dua ki aur is pani se kulli ki aur kulli ka pani kunwein mein daal diya. Abhi thodi der bhi nahi hui thi ke kunwan phir pani se bhar gaya. Hum bhi is se khoob sair hue aur hamare ont bhi seerab ho gaye ya pani pee kar laute.