Hum se Musa Bin Ismail ne bayan kiya, hum se Abd-ul-Wahid Bin Ziyad ne bayan kiya, hum se Aamash ne bayan kiya, un se Abu Salih ne aur un se Abu Said Khudri (Radi Allahu Anhu) ne bayan kiya ke Nabi Kareem (Sallallahu Alaihi Wasallam) ne farmaya "(Qiyamat ke din) Nooh Alaihis Salam bargah-e-Ilahi mein hazir honge. Allah Ta'ala daryaft farmaye ga, kya (mera paigham) tum ne pahuncha diya tha? Nooh Alaihis Salam arz kareinge mein ne tera paigham pahuncha diya tha. Ae Rabb-ul-Izzat! Ab Allah Ta'ala un ki ummat se daryaft farmaye ga, kya (Nooh Alaihis Salam ne) tum tak mera paigham pahuncha diya tha? Wo jawab dein ge nahi, hamare paas tera koi nabi nahi aaya. Is par Allah Ta'ala Nooh Alaihis Salam se daryaft farmaye ga, is ke liye aap ki taraf se koi gawahi bhi de sakta hai? Wo arz kareinge ke Muhammad (Sallallahu Alaihi Wasallam) aur un ki ummat (ke log mere gawah hain) chunanche hum is baat ki shahadat dein ge ke Nooh Alaihis Salam ne Allah Ta'ala ka paigham apni qaum tak pahunchaya tha aur yahi mafhoom Allah Jalla Zikruhu ke is irshad ka hai 'wa-kazalika ja-alnākum ummatan wasatan litakūnu shuhada-a ala-n-nasi' 'Aur isi tarah hum ne tumhein ummat-e-wasat banaya taake tum logon par gawahi do.' Aur 'wasat' ke maane darmiyani ke hain."
.