(Surah Al-Rahman mein lafz) "Salsal" ke maane aise gaare ke hain jis mein reti mili ho aur wo is tarah se bajne lage jaise paki hui mitti bajti hai. Baaz ne kaha "Salsal" ke maane "muntin" yaani bad-boodar ke hain. Asal mein ye lafz "salla" se nikla hai. Faa-kalma mukarrar kar diya ya jaise "sarsara" se Arab log kehte hain "sarra-l-babu" ya "sarsara-l-babu" jab band karne se darwaze mein se awaz nikle jaise "kabkabtuhu" "kabba" se nikla hai. Surah Al-Araf mein lafz "famarat bihi" ka maane chalti phirti rahi, hamal ki muddat poori ki, (Surah Al-Araf mein) lafz "an la tasjuda" ka maane "an tasjuda" ke hain. Yaani tujh ko sajda karne se kis baat ne roka. "La" ka lafz yahan zaid hai
.

Ibn Abbas (Radi Allahu Anhuma) ne kaha Surah Al-Tariq mein jo "lamma alaiha hafizun" ke alfaz hain, yahan "lamma" "illa" ke maane mein hai. Yaani koi jaan nahi magar is par Allah ki taraf se ek nigahban muqarrar hai, (Surah Al-Balad mein jo) "fi kabadin" ka lafz aaya hai "kabadin" ke maane sakhti ke hain. Aur (Surah Al-Araf mein) jo "reeshan" ka lafz aaya hai "riyashun" is ki jama hai yaani maal. Ye Ibn Abbas (Radi Allahu Anhuma) ki tafseer hai doosron ne kaha, "riyashun" aur "reeshun" ka ek hi maane hai. Yaani zahiri libas aur (Surah Al-Waqi'a mein) jo "tumnoona" ka lafz aaya hai is ke maane "nutfatun" ke hain jo tum auraton ke reham mein (jama kar ke) dalte ho. (Aur Surah Al-Tariq mein hai) "innahu ala raj'ihi la-qadirun" Mujahid ne kaha is ke maane ye hain ke wo Allah mani ko phir zikar mein lauta sakta hai (is ko Faryabi ne wasal kiya, aksar logon ne ye maane kiye hain ke wo Allah aadmi ke lautane yaani qiyamat mein paida karne par qadir hai) (aur Surah Al-Sajda mein) "kulla shai-in khalaqahu" ka maane ye hai ke har cheez ko Allah ne jode jode banaya hai. Aasman zameen ka joda hai (jinn aadmi ka joda hai, sooraj chand ka joda hai.) Aur taaq Allah ki zaat hai jis ka koi joda nahi hai. Surah Al-Teen mein hai "fi ahsani taqweemin" yaani acchi surat acchi khilqat mein hum ne insan ko paida kiya. "asfala safileena illa man amana" yaani phir aadmi ko hum ne past se past tar kar diya (dozakhi bana diya) magar jo iman laya. (Surah Al-Asar mein) "fi khusrin" ka maane gumrahi mein phir iman walon ko mustasna kiya. (Farmaya "illa-llazina amanu") Surah Al-Saffat mein "lazibun" ke maane lazim (yaani chimat-ti hui lais dar) Surah Al-Waqi'a mein alfaz "nunshi-ukum fi ma la talamoona" yaani jonsi surat mein hum chahein tum ko bana dein. (Surah Al-Baqarah mein) "nusabbihu bi-hamdika" yaani farishton ne kaha ke hum teri badayi bayan karte hain. Abu-ul-Aaliya ne kaha isi surat mein jo hai "fatalaqqa adamu min rabbihi kalimatin" wo kalmat ye hain "rabbana zhalamna anfusana" isi surat mein "fa-azallahuma" ka maane yaani un ko dag-maga diya phisla diya. (Isi surat mein hai) "lam yatasannah" yaani bigda tak nahi. Isi se (Surah Muhammad mein) "aasinin" yaani bigda hua (bad-boodar pani) isi se Surah Al-Hijr mein lafz "masnoonun" hai yaani badli hui bad-boodar. (Isi surat mein) "hama-in" ka lafz hai jo "hamatun" ki jama hai yaani bad-boodar keechad (Surah Al-Araf mein) lafz "yakhsifani" ke maane yaani dono Aadam aur Hawwa ne bahisht ke patton ko jodna shuru kar diya. Ek par ek rakh kar apna sattar chhupane lage. Lafz "sau-atihima" se murad sharmgah hain. Lafz "wa mata'un ila hinin" mein "hinin" se qiyamat murad hai, Arab log ek ghadi se le kar be-inteha muddat tak ko "hinin" kehte hain. "qabeeluhu" se murad shaitan ka giroh jis mein wo khud hai
.

Hum se Abdullah Bin Muhammad ne bayan kiya, unhon ne kaha hum se Abdur Razzaq ne bayan kiya, un se Ma'mar ne, un se Hammam ne aur un se Abu Hurairah (Radi Allahu Anhu) ne ke Nabi Kareem (Sallallahu Alaihi Wasallam) ne farmaya "Allah Paak ne Aadam Alaihis Salam ko paida kiya to un ko saath hath lamba banaya phir farmaya ke ja aur in malaika ko salam kar, dekhna kin lafzon mein wo tumhare salam ka jawab dete hain kyunke wahi tumhara aur tumhari aulad ka tariqa-e-salam ho ga. Aadam Alaihis Salam (gaye aur) kaha, Assalamu Alaikum! Farishton ne jawab diya, Assalamu Alaika wa Rahmatullahi. Unhon ne 'wa Rahmatullahi' ka jumla badha diya, pas jo koi bhi jannat mein dakhil ho ga wo Aadam Alaihis Salam ki shakal aur qamat par dakhil ho ga, Aadam Alaihis Salam ke baad insano mein ab tak qadd chhote hote rahe."
.