Hum se Abdullah Bin Yusuf ne bayan kiya, kaha hum ko Abdullah Bin Wahb ne khabar di, kaha ke mujhe Yunus ne khabar di, un se Ibn Shihab ne kaha, un se Urwah ne kaha aur un se Nabi Kareem (Sallallahu Alaihi Wasallam) ki zauja mutahira Aisha (Radi Allahu Anha) ne kaha ke unhon ne Nabi Kareem (Sallallahu Alaihi Wasallam) se pucha, kya Aap par koi din Uhud ke din se bhi zyada sakht guzra hai? Aap (Sallallahu Alaihi Wasallam) ne is par farmaya ke tumhari qaum (Quraish) ki taraf se mein ne kitni musibatain uthayi hain lekin is sare daur mein Uqba ka din mujh par sab se zyada sakht tha ye wo mauqa tha jab mein ne (Taif ke sardar) Kinana Bin Abd-ya-Lail Bin Abd-Kulal ke haan apne aap ko pesh kiya tha. Lekin us ne (Islam ko qabool nahi kiya aur) meri dawat ko radd kar diya. Mein wahan se intihayi ranjeeda ho kar wapas hua. Phir jab mein Qarn-ul-Sa'alib pahuncha, tab mujh ko kuch hosh aaya, mein ne apna sarr uthaya to kya dekhta hoon ke badli ka ek tukda mere upar sayah kiye hue hai aur mein ne dekha ke Jibrail Alaihis Salam is mein maujood hain, unhon ne mujhe awaz di aur kaha ke Allah Ta'ala Aap ke bare mein Aap ki qaum ki baatein sun chuka aur jo unhon ne radd kiya hai wo bhi sun chuka. Aap ke paas Allah Ta'ala ne pahadon ka farishta bheja hai, Aap un ke bare mein jo chahein is ka ise hukm de dein. Is ke baad mujhe pahadon ke farishte ne awaz di, unhon ne mujhe salam kiya aur kaha ke Ae Muhammad (Sallallahu Alaihi Wasallam)! Phir unhon ne bhi wahi baat kahi, Aap jo chahein (is ka mujhe hukm farmaein) agar Aap chahein to mein dono taraf ke pahad un par la kar mila doon (jin se wo chakna choor ho jayein) Nabi Kareem (Sallallahu Alaihi Wasallam) ne farmaya, mujhe to is ki umeed hai ke Allah Ta'ala in ki nasal se aisi aulad paida karega jo akele Allah ki ibadat karegi, aur is ke sath kisi ko shareek na thehraye gi
.