Aur Jabir bin Abdullah aur Abu Sa’eed Radhiallahu Anhum Nabi-e-Kareem Sallallahu Alaihi Wasallam se riwayat karte hain ke haaiza Namaz chhod de.

Hum se Musa bin Ismail ne bayan kiya, kaha hum se Hammam bin Yahya ne, kaha hum se Qatadah ne, kaha mujh se Mu’aadhah Bint-e-Abdullah ne ke ek aurat ne Aisha Radhiallahu Anha se poocha ke jis zamaane mein hum paak rehte hain. (Haiz se) Kya hamaare liye usi zamaane ki Namaz kaafi hai. Us par Aisha Radhiallahu Anha ne farmaaya ke kya tum Hurooriyyah ho? Hum Nabi-e-Kareem Sallallahu Alaihi Wasallam ke zamaane mein haaiza hoti thien aur Aap hamein Namaz ka hukm nahi dete the. Ya Aisha Radhiallahu Anha ne yeh farmaaya ke hum Namaz nahi padhti thien.