Hum se Abu Yaman ne bayan kiya, unhon ne kaha hum ko Shuaib ne khabar di, unhein Zuhri ne kaha ke mujh se Urwah Bin Zubair (Radi Allahu Anhu) ne bayan kiya, un se Miswar Bin Makhrama (Radi Allahu Anhuma) ne aur unhein Amr Bin Auf (Radi Allahu Anhu) ne khabar di wo Bani Aamir Bin Luay ke haleef thay aur jung-e-Badr mein shareek thay. Unhon ne un ko khabar di ke Rasul Allah (Sallallahu Alaihi Wasallam) ne Abu Ubaidah Bin Jarrah (Radi Allahu Anhu) ko Bahrain jizya wasool karne ke liye bheja tha. Aap (Sallallahu Alaihi Wasallam) ne Bahrain ke logon se sulah ki thi aur un par Alaa Bin Hadharmi (Radi Allahu Anhu) ko hakim banaya tha. Jab Abu Ubaidah (Radi Allahu Anhu) Bahrain ka mal le kar aaye to Ansar ko maloom ho gaya ke Abu Ubaidah (Radi Allahu Anhu) aa gaye hain. Chunanche fajr ki namaz sab logon ne Nabi Kareem (Sallallahu Alaihi Wasallam) ke sath parhi. Jab Aap (Sallallahu Alaihi Wasallam) namaz parha chuke to log Aap (Sallallahu Alaihi Wasallam) ke samne aaye. Aap (Sallallahu Alaihi Wasallam) unhein dekh kar muskuraye aur farmaya ke mera khayal hai ke tum ne sun liya hai ke Abu Ubaidah kuch le kar aaye hain? Ansar (Radi Allahu Anhum) ne arz kiya ji haan, Ya Rasul Allah! Aap (Sallallahu Alaihi Wasallam) ne farmaya, tumhein khushkhabri ho, aur is cheez ke liye tum pur-umeed raho. Jis se tumhein khushi hogi, lekin Allah ki qasam! Mein tumhare bare mein muhtaji aur faqar se nahi darta. Mujhe agar khauf hai to is baat ka kuch duniya ke darwaze tum par is tarah khol diye jayenge jaise tum se pehle logon par khol diye gaye thay, to aisa na ho ke tum bhi un ki tarah ek doosre se jalne lago aur ye jalna tum ko bhi isi tarah tabah kar de jaisa ke pehle logon ko kiya tha
.