Hum se Abul Numan ne bayan kiya, kaha hum se Hammad Bin Zaid ne bayan kiya, un se Yahya Bin Saeed Ansari ne, un se Muhammad Bin Yahya Bin Habban ne aur un se Anas Bin Malik (Radi Allahu Anhu) ne bayan kiya aur un se Umm-e-Haram (Radi Allahu Anha) ne ye waqea bayan kiya tha ke Nabi Kareem (Sallallahu Alaihi Wasallam) ek din un ke ghar tashreef la kar qaylula farmaya tha. Jab aap (Sallallahu Alaihi Wasallam) bedar hue to hans rahe thay. Unhon ne poocha ya Rasul Allah! Kis baat par aap hans rahe hain? Farmaya mujhe apni ummat mein ek aisi qaum ko (khwab mein dekh kar) khushi hui jo samundar mein (ghazwah ke liye) is tarah ja rahe thay jaise badshah takht par baithe hon. Mein ne arz kiya: ya Rasul Allah! Allah se dua kijiye ke mujhe bhi wo un mein se kar de. Aap (Sallallahu Alaihi Wasallam) ne farmaya ke tum bhi un mein se ho. Is ke baad phir aap (Sallallahu Alaihi Wasallam) so gaye aur jab bedar hue to phir hans rahe thay. Aap (Sallallahu Alaihi Wasallam) ne is martaba bhi wahi baat batayi. Aaisa do ya teen dafa hua. Mein ne kaha: ae Allah ke Rasul! Allah Ta'ala se dua kijiye ke mujhe bhi un mein se kar de. Aap (Sallallahu Alaihi Wasallam) ne farmaya ke tum sab se pehle lashkar ke sath ho gi wo Ubadah Bin Samit (Radi Allahu Anhu) ke nikah mein thiin aur wo un ko (Islam ke sab se pehle bahri bere ke sath) ghazwah mein le gaye, wapasi mein sawar hone ke liye apni sawari se qareeb huein (sawar hote hue ya sawar hone ke baad) gir pariin jis se aap ki gardan toot gayi aur shahadat ki maut payi
.