Hum se Muslim Bin Ibrahim ne bayan kiya, unhon ne kaha hum se Abu Aqeel o Bishr Bin Uqba ne bayan kiya, unhon ne kaha hum se Abul Mutawakkil Naji (Ali Bin Dawood) ne bayan kiya, unhon ne kaha mein Jabir Bin Abdullah Ansari (Radi Allahu Anhuma) ki khidmat mein hazir hua aur arz kiya ke aap ne Rasul Allah (Sallallahu Alaihi Wasallam) se jo kuch suna hai, un mein se mujh se bhi koi hadees bayan kijaiye. Unhon ne bayan farmaya ke mein Nabi Kareem (Sallallahu Alaihi Wasallam) ke sath ek safar mein tha. Abu Aqeel rawi ne kaha ke mujhe maloom nahi (ye safar) jihad ke liye tha ya umrah ke liye (wapas hote hue) jab (Madinah Munawwarah) dikhayi dene laga to Aap (Sallallahu Alaihi Wasallam) ne farmaya jo shakhs apne ghar jaldi jana chahe wo ja sakta hai. Jabir (Radi Allahu Anhu) ne bayan kiya ke phir hum aage barhe. Mein apne ek siyahi mayal surkh oont be-dagh par sawar tha doosre log mere peeche reh gaye, mein isi tarah chal raha tha ke oont ruk gaya (thak kar) Nabi Kareem (Sallallahu Alaihi Wasallam) ne farmaya Jabir! Apna oont tham le, Aap (Sallallahu Alaihi Wasallam) ne apne kore se oont ko mara, oont kood kar chal nikla phir Aap (Sallallahu Alaihi Wasallam) ne daryaft farmaya ye oont becho ge? Mein ne kaha haan! Jab Madinah pahunche aur Nabi Kareem (Sallallahu Alaihi Wasallam) apne ashab ke sath Masjid-e-Nabwi mein dakhil hue to mein bhi Aap (Sallallahu Alaihi Wasallam) ki khidmat mein pahuncha aur ”Balat“ ke ek kone mein, mein ne oont ko bandh diya aur Nabi Kareem (Sallallahu Alaihi Wasallam) se arz kiya ye Aap ka oont hai. Phir Aap (Sallallahu Alaihi Wasallam) bahar tashreef laye aur oont ko ghumane lage aur farmaya ke oont to hamara hi hai, is ke baad Aap (Sallallahu Alaihi Wasallam) ne chand auqiya sona mujhe dilwaya aur daryaft farmaya tum ko qeemat poori mil gayi. Mein ne arz kiya ji haan. Phir Aap (Sallallahu Alaihi Wasallam) ne farmaya ab qeemat aur oont (donon hi) tumhare hain
.