Hum se Yahya Bin Bukair ne bayan kiya, un se Lais ne, un se Yazid Bin Abi Habib ne, un se Bukair ne, un se Ibn Abbas ke ghalam Kuraib ne aur unhein (Umm-ul-Momineen) Maimoona Bint Haris (Radi Allahu Anha) ne khabar di ke unhon ne ek londi Nabi Kareem (Sallallahu Alaihi Wasallam) se ijazat liye baghair azad kar di. Phir jis din Nabi Kareem (Sallallahu Alaihi Wasallam) ki bari aap ke ghar aane ki thi, unhon ne khidmat-e-nabwi mein arz kiya, Ya Rasul Allah (Sallallahu Alaihi Wasallam)! aap ko maloom bhi hua, mein ne ek londi azad kar di hai. Aap (Sallallahu Alaihi Wasallam) ne farmaya, accha tum ne azad kar diya? Unhon ne arz kiya ke han! farmaya ke agar is ke bajaye tum ne apne nanhiyal walon ko di hoti to tumhein is se bhi zyada sawab milta. Is hadees ko Bukair Bin Mudar ne Amr Bin Haris se, unhon ne Bukair se, unhon ne Kuraib se Riwayat kiya ke Maimoona (Radi Allahu Anha) ne apni londi azad kar di. Akheer tak
.