Aur Sayyida Aisha (Radi Allahu Anha) ne kaha ke phir Abu Bakr (Radi Allahu Anhu) ne apne ghar ke sehan mein ek masjid banayi, jis mein wo namaz parhte aur Quran ki tilawat kiya karte thay. Mushrakoon ki auraton aur bacchon ki wahan bheer lag jati aur sab bahut mutajjub hote. In dinon Nabi Kareem (Sallallahu Alaihi Wasallam) ka qayam Makkah mein tha
.

Hum se Muaz Bin Fadalah ne bayan kiya, unhon ne kaha hum se Abu Amr Hafs Bin Maisarah ne bayan kiya, aur un se Zaid Bin Aslam ne bayan kiya, un se Ata Bin Yasar ne bayan kiya, aur un se Abu Saeed Khudri (Radi Allahu Anhu) ne bayan kiya ke Nabi Kareem (Sallallahu Alaihi Wasallam) ne farmaya raston mein baithne se bacho. Sahaba ne arz kiya ke hum to wahan baithne par majboor hain. Wahi humare baithne ki jagah hoti hai ke jahan hum baatein karte hain. Is par Aap (Sallallahu Alaihi Wasallam) ne farmaya ke agar wahan baithne ki majboori hi hai to raste ka haq bhi ada karo. Sahaba ne poocha aur raste ka haq kya hai ? Aap (Sallallahu Alaihi Wasallam) ne farmaya, nigah neechi rakhna, kisi ko eeza dene se bachna, salam ka jawab dena, acchi baaton ke liye logon ko hukum karna aur bri baaton se rokna
.