Hum se Makki Bin Ibrahim ne bayan kiya, kaha ke hum se Yazid Bin Abi Ubaid ne bayan kiya, un se Salama Bin Akwa (Radi Allahu Anhu) ne ke hum Nabi Kareem (Sallallahu Alaihi Wasallam) ki khidmat mein maujood thay ke ek janaza laya gaya. Logon ne Aap (Sallallahu Alaihi Wasallam) se arz kiya ke is ki namaz parha dijiyi-ay. Is par Aap (Sallallahu Alaihi Wasallam) ne poocha kya is par koi qarz hai ? Logon ne bataya ke nahi koi qarz nahi hai. Aap (Sallallahu Alaihi Wasallam) ne daryaft farmaya ke mayyat ne kuch maal bhi chhora hai ? Logon ne arz kiya koi maal bhi nahi chhora. Aap (Sallallahu Alaihi Wasallam) ne un ki namaz-e-janaza parhayi. Is ke baad ek doosra janaza laya gaya logon ne arz kiya Ya Rasul Allah! Aap in ki bhi namaz-e-janaza parha dijiyi-ay. Nabi Kareem (Sallallahu Alaihi Wasallam) ne daryaft farmaya, kisi ka qarz bhi mayyat par hai ? Arz kiya gaya ke hai. Phir Aap (Sallallahu Alaihi Wasallam) ne daryaft farmaya, kuch maal bhi chhora hai ? Logon ne kaha ke teen dinar chhore hain. Aap ne un ki bhi namaz-e-janaza parhayi. Phir teesra janaza laya gaya. Logon ne Aap ki khidmat mein arz kiya ke is ki namaz parha dijiyi-ay. Nabi Kareem (Sallallahu Alaihi Wasallam) ne un ke mutalliq bhi wahi daryaft farmaya, kya koi maal-e-tarka chhora hai ? Logon ne kaha ke nahi. Aap (Sallallahu Alaihi Wasallam) ne daryaft farmaya, aur us par kisi ka qarz bhi hai ? Logon ne kaha ke han teen dinar hain. Aap (Sallallahu Alaihi Wasallam) ne is par farmaya ke phir apne saathi ki tum hi log namaz parh lo. Abu Qatada (Radi Allahu Anhu) bole, Ya Rasul Allah! Aap (Sallallahu Alaihi Wasallam) in ki namaz parha dijiyi-ay, un ka qarz mein ada kar donga. Tab Aap (Sallallahu Alaihi Wasallam) ne is par namaz parhayi
.