Ibn Abbas (Radi Allahu Anhuma) aur Abu Saeed Khudri (Radi Allahu Anhu) aur Aswad aur Imam Hasan Basri ne yahi kaha hai. Aur Ibn Umar (Radi Allahu Anhuma) ne kaha agar ghalla ka nirkh aur is ki sifat bayan kar di jaye to miyaad muayyan kar ke is mein bai-salam karne mein koi qabahat nahi. Agar ye ghalla kisi khas khet ka na ho, jo abhi paka na ho
.

Hum se Abu Nuaym ne bayan kiya, unhon ne kaha ke hum se Sufyan Bin Uyainah ne bayan kiya, un se Ibn Abi Najeeh ne, un se Abdullah Bin Abbas (Radi Allahu Anhuma) ne bayan kiya ke jab Nabi Kareem (Sallallahu Alaihi Wasallam) Madinah tashreef laye to log phalon mein do aur teen saal tak ke liye bai-salam kiya karte thay. Aap (Sallallahu Alaihi Wasallam) ne unhein hidayat ki ke phalon mein bai-salam muqarrara paimane aur muqarrara muddat ke liye kiya karo. Aur Abdullah Bin Waleed ne kaha hum se Sufyan Bin Uyainah ne kaha, un se Ibn Abi Najeeh ne bayan kiya, is Riwayat mein yun hai ke ”Paimane aur wazan ki tayein ke sath“ (bai-salam honi chahiye)
.