Aur Qazi Shuraih ne soot bechne walon se kaha jaise tum logon ka riwaj hai isi ke muwafiq hukm diya jaye ga aur Abdul Wahhab ne Ayyub se riwayat ki, unhon ne Muhammad Bin Sireen se ke das ka mal gyarah mein bechne mein koi qabahat nahi. Aur jo kharcha para hai is par bhi yehi nafa le aur Nabi Kareem (Sallallahu Alaihi Wasallam) ne Hinda (Abu Sufyan ki aurat) se farmaya, tu apna aur apne bachon ka kharch dastoor ke muwafiq nikal le. Aur Allah Ta'ala ne farmaya ke jo koi muhtaj ho wo (yateem ke mal mein se) naik niyate ke sath kha le. Aur Imam Hasan Basri (Rahimahullah) ne Abdullah Bin Mirdas se gadha kiraye par liya to un se is ka kiraya poocha, to unhon ne kaha ke do waniq hai. (ek waniq dirham ka chhatta hissa hota hai) is ke baad wo gadhe par sawar hue, phir doosri martaba ek zaroorat par aap aaye aur kaha ke mujhe gadha chahiye. Is martaba aap is par kiraya muqarrar kiye baghair sawar hue aur un ke paas aadha dirham bhej diya
.

Hum se Abdullah Bin Yusuf ne bayan kiya, unhon ne kaha ke hum ko Imam Malik ne khabar di, unhein Humaid Taweel ne aur unhein Anas Bin Malik (Radi Allahu Anhu) ne ke Rasul Allah (Sallallahu Alaihi Wasallam) ko Abu Taiba ne pacha-na lagaya to Aap (Sallallahu Alaihi Wasallam) ne unhein ek saa khajoor (mazdoori mein) dene ka hukm farmaya. Aur is ke malikon se farmaya ke wo is ke kharaj mein kuch kami kar dein
.