Hum se Muhammad Bin Muthanna ne bayan kiya, kaha ke mujh se Khalid ne (jo Harith ke bete hain) bayan kiya, un se Humaid ne aur un se Anas (Radi Allahu Anhu) ne ke Nabi Kareem (Sallallahu Alaihi Wasallam) Umm-e-Suleim (Radi Allahu Anha) nami ek aurat ke yahan tashreef le gaye. Unhon ne aap (Sallallahu Alaihi Wasallam) ki khidmat mein khajoor aur ghee pesh kiya. Aap (Sallallahu Alaihi Wasallam) ne farmaya, ye ghee is ke bartan mein rakh do aur ye khajoorein bhi is ke bartan mein rakh do kyunke mein to roze se hoon, phir aap ne ghar ke ek kinare mein kharay ho kar nafal namaz parhi aur Umm-e-Suleim (Radi Allahu Anha) aur un ke ghar walon ke liye dua ki, Umm-e-Suleim (Radi Allahu Anha) ne arz ki ke mera ek baccha laadla bhi to hai (is ke liye bhi to dua farma dijiye) farmaya kaun hai unhon ne kaha aap ka khadim Anas (Radi Allahu Anhu) phir Aap (Sallallahu Alaihi Wasallam) ne duniya aur aakhirat ki koi khair-o-bhalayi na chori jis ki un ke liye dua na ki ho. Aap ne dua mein ye bhi farmaya ae Allah! usay mal aur aulad ata farma aur is ke liye barkat ata kar (Anas Radi Allahu Anhu ka bayan tha ke) chunanche mein ansar mein sab se zyada maldar hoon. Aur mujh se meri beti Ameena ne bayan kiya Hajjaj ke Basra aane tak meri sulbi aulad mein se taqreeban ek sau bees dafan ho chuke thay. Hum se Ibn Abi Maryam ne bayan kiya, unhein Yahya ne khabar di, kaha ke mujh se Humaid ne bayan kiya, aur unhon ne Anas (Radi Allahu Anhu) se suna, Nabi Kareem (Sallallahu Alaihi Wasallam) ke hawala ke sath
.