Aur mujh se Yahya Bin Salih ne bayan kiya, kaha hum se Muawiyah Bin Salam ne bayan kiya, kaha hum se Yahya Bin Abi Kathir ne bayan kiya, un se Umar Bin Hakam Bin Thauban ne aur unhon ne Abu Hurairah (Radi Allahu Anhu) suna ke jab koi qay kare to roza nahi tootta kyunke is se to cheez bahar aati hai andar nahi jati aur Abu Hurairah (Radi Allahu Anhu) se ye bhi manqool hai ke is se roza toot jata hai lekin pehli riwayat zyada sahi hai aur Ibn Abbas aur Ikrima (Radi Allahu Anhuma) ne kaha ke roza tootta hai in cheezon se jo andar jati hain in se nahi jo bahar aati hain. Ibn Umar (Radi Allahu Anhuma) bhi roza ki halat mein pachna lagwate lekin baad mein din ko usay tark kar diya tha aur raat mein pachna lagwane lage thay aur Abu Musa Ashari (Radi Allahu Anhu) ne bhi pachna lagwaya tha aur Saad Bin Abi Waqqas aur Zaid Bin Arqam aur Umm-e-Salma (Radi Allahu Anhum) se riwayat hai ke unhon ne roza ki halat mein pachna lagwaya, Bukair ne Umm-e-Alqama se kaha ke hum Aisha (Radi Allahu Anha) ke han (roza ki halat mein) pachna lagwaya karte thay aur aap humein rokti nahi theen, aur Hasan Basri (Rahimahullah) kai sahaba se marfuan riwayat karte hain ke Nabi Kareem (Sallallahu Alaihi Wasallam) ne farmaya pachna lagane wale aur lagwane wale (donon ka) roza toot gaya aur mujh se Ayash Bin Walid ne bayan kiya aur un se Abdul Ala ne bayan kiya, un se Yunus ne bayan kiya aur un se Hasan Basri ne aisi hi riwayat ki, jab un se poocha gaya ke kya Nabi Kareem (Sallallahu Alaihi Wasallam) se riwayat hai to unhon ne kaha ke han phir kehne lage Allah behtar janta hai
.

Hum se Mualla Bin Asad ne bayan kiya, un se Wuhaib ne, wo Ayyub se, wo Ikrima se, wo Ibn Abbas (Radi Allahu Anhuma) se riwayat karte hain ke Nabi Kareem (Sallallahu Alaihi Wasallam) ne ihram mein aur roze ki halat mein pachna lagwaya
.