Hum se Muhammad Bin Bashar ne bayan kiya, kaha ke hum se Abdur Rahman Bin Mahdi ne bayan kiya, un se Sufyan Thauri ne, un se Amash ne, un se un ke walid Yazid Bin Shareek ne aur un se Ali (Radi Allahu Anhu) ne bayan kiya ke mere paas Kitab-ul-Allah aur Nabi Kareem (Sallallahu Alaihi Wasallam) ke is sahifa ke siwa jo Nabi Kareem (Sallallahu Alaihi Wasallam) ke hawala se hai aur koi cheez (sharyee ahkam se mutaliq) likhi hui surat mein nahi hai. Is sahifa mein ye bhi likha hua hai ke Nabi Kareem (Sallallahu Alaihi Wasallam) ne farmaya Madinah Aair pahari se le kar falan maqam tak Haram hai, jis ne is had mein koi bidat nikali ya kisi bidati ko panah di to is par Allah aur tamam Malaika aur Insaanon ki lanat hai, na is ki koi farz ibadat maqbool hai na nafal aur Aap (Sallallahu Alaihi Wasallam) ne farmaya ke tamam musalmanon mein se kisi ka bhi ahd kafi hai is liye agar kisi musalman ki (di hui aman mein doosre musalman ne) bad-ahdi ki to is par Allah Ta'ala aur tamam Malaika aur Insaanon ki lanat hai. Na is ki koi farz ibadat maqbool hai na nafal, aur jo koi apne malik ko chor kar is ki ijazat ke baghair kisi doosre ko malik banaye, is par Allah aur tamam Malaika aur Insaanon ki lanat hai, na is ki koi farz ibadat maqbool hai na nafal
.